په افغانستان کې د بهرنیو پوځونو بیا پیلېدونکی جنګي ماموریت

 تبصره

د امریکا پخواني ولسمشر اوباما چې د ۲۰۰۹ز کال له انتخاباتو وروسته حکومتولي پیل کړه، له امریکايي ولس سره یې د کمپاین پر مهال کړې وعده (له افغانستانه د پوځ ایستل) نیمه پوره کړه. اوباما د خپل کمپاین پر مهال له امریکایي ولس سره وعده کړې وه چې په افغانستان کې به له تاواني جګړې د پوځونو په راایستلو ځان خلاصوو څو په افغانستان کې د جګړې په لګښتونو خپل اقتصاد غښتلی کړو.

اوباما د واکمنۍ په دواړو دورو کې په افغانستان کې روانه جګړه پای ته ونه رسوله، خو  ۲۰۱۴ز کال یې په افغانستان کې د بهرنیو پوځونو د جګړې د ماموریت د پای کال اعلان کړ.

برعکس، ټرمپ د حکومت په لومړۍ سټراټیژۍ کې په افغانستان کې د جګړې په دوام ټینګار وښود او د سولې لپاره یې ټول امکانات له منځه یووړل. ځکه خو دا دی، د ټرمپ د پالیسۍ له مخې، د بهرنیو پوځونو پای ته رسېدلی جنګي ماموریت د نورو پوځونو په رالېږلو بیا پیلېږي.

د امریکا لخوا افغانستان ته نور اعلان شوي پوځونه رارسېدلي دي. په افغانستان کې د ناټو ویاند ویلي دي چې دوی جنګي تجربه لري او له افغان پوځونو سره به د طالب وسله والو پر خلاف مرسته کوي.

 له جګړې سره د یوه هېواد پوځیان هم مینه نه لري، خو په افغانستان کې د ناټو د غوڅ ماموریت ویاند، ټام ګریسبک، وايي چې افغانستان ته نوي رارسېدلي پوځیان له جګړې سره مینه لري. مانا دا چې، په افغانستان کې د کورونو له ړنګولو سره مینه لري او د افغانانو په وژلو کې تجربه لري.

د ناټو د غوڅ ماموریت د ویاند په وینا به یې پوځونه له جګړې سره مینه لري، خو افغانان هم له پردیو پوځونو سره د مقابلې، د خپلې خاورې د ساتنې، د ملي ارزښتونو له دفاع سره مینه او د یرغلګرو په ماتې کې تجربه لري.

امریکا چې په افغانستان کې د بهرنیو پوځونو پای ته رسېدلی جنګي ماموریت بیا پیل کړ، لکه څرنګه چې یې لومړی پوځي ماموریت په خپله ناکامۍ پای ته رسېدلی اعلان کړ، دا ډول به بیا پیل شوی ماموریت هم په ناکامۍ سره پای ته رسېدلی اعلان کړي او له افغانستانه به د خپلو پوځونو د ایستلو لار ګوري.

که امریکا په دې موخه افغانستان ته نور پوځونه رالېږي چې د افغان حکومت له لاسه وتلې سیمې به بیا له طالبانو ونیسي، نو کلونه کلونه به جګړه وکړي، په شپنیو ړندو عملیاتو کې به نور ولسي وګړي ووژني، خو په ولایاتو کې له لاسه وتلې سیمې به ترلاسه نکړي بلکې نورې سیمې به هم ترې طالبان ونیسي. ځکه دا اوس کومې سیمې د طالبانو په واک کې دي، دا یې په افغانستان کې تر یو لک د زیاتو بهرنیو پوځونو په موجودیت کې له افغان حکومته نیولي دي.

امریکا به په افغانستان کې د خپلو پوځونو جنګي ماموریت کله پای ته رسوي او کله به یې بیا پیلوي، خو افغان ولس له خپلې خاورې د دفاع ماموریت (مقدس جهاد) ته تر هغو دوام ورکوي څو بهرني پوځونه سرماتي او غاښ ماتي تېښتې ته اړ کړي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close