په مسکو کې د عباس ستانکزي د خبري کانفرنس ژباړه

ژباړه: محمد عمر منصور

 قدرمنو لوستونکو!

لومړى بايد روښانه کړم چې دلته مې د خبريالانو پوښتنې نه بلکې يوازي د عباس ستانکزي صاحب ځوابونه را ژباړلي دي، دلته هر نوى پېراګراف د يوې نوې پوښتنې ځواب ده.

 پېل: د غربي هېوادو د سروې له مخې له 75سلنه زياته ځمکه زمونږ تر تسلط لاندې ده، د کابل ادارې (اشرف غني حکومت) کې د زيات فساد او بې انصافي لامله ان د دوى تر ولکې لاندې سيمو خلک هم د فيصلو او اړوند نورو کارو د حل لپاره د اسلامي امارت ادارو ته مراجعه کوي.

په رسنيو کې خپرېدونکي د کابل ادارې اکثره بيانيې له حقيقت لرې محض تورونه دي، ستا د پوښتنې په ځواب کې بايد ووايم، اسلامي امارت يو متحد نظم ده، په مونږ کې دننه هيڅ ډلې ټپلې نشته، د اسلامي امارت تر نامه لاندې ټول نظاميان او سياسيان د يوه مشر (شيخ هبة الله) تر امر او هداياتو لاندې خپل فعاليتونه مخ پر وړاندې وړي، د کمکي اختر اوربند چې په ټول افغانستان کې يو ډز هم نه وشو دا ثابته کړه چې طالبان ټول يوه ډله ده او افغانستان کې د شلو ډلو  خبرې هسې چټيات او دروغ دي.

هو زمونږ مشر پرېکړه کړې چې له ګونتنامو راخلاص شوي طالب مشران به په قطر کې زمونږ د سياسي دفتر غړي شي او د سولې په خبرو کې به زمونږ مرستندويان شي.

داسې فکر مه کوئ، څه چې امريکه وايي هغه به ټول ريښتيا وي، مونږ له روسيې سره ډيپلوماتيکې اړيکې لرو خو د روسيې لخوا زمونږ سره د مرستې تورونه هيڅ حقيقت نه لري او زه يې قطعاً ردوم.

د سولې خبرې دوه اړخه لري، لومړى اړخ يې له امريکا سره خبرې دي؛ هغه ستونزې چې له امريکې سره تړلې دي لکه د دوى د فوځونو ايستل، زمونږ غړي له تور لسټ ايستل، زمونږ سياسي دفتر په رسميت پېژندل او دې ته ورته نورو ستونزو په تړاو له امريکې سره ژغېږو او کومې ستونزې چې زمونږ د افغانانو داخلي دي لکه د راروان حکومت جوړول او داسې نورو په اړه له خپلو افغاني مخالفينو سره هم ژغېده کوو خو په دې شرط چې امريکه د نړيوالو په ضمانت د خپلو فوځونو د ايستلو يو مالوم مهال وېش اعلان کړي.

د امريکې له استازي (زلمي خليل زاد) سره مو خبرې بيخي ابتدائي وې، چې کله هم اصلي خبرو ته سره ورسېږو، هرو مرو به يې تفصيلات له رسنيو سره شريک کړو ولې اوسمهال يې جزيات بيانول له وخت مخکې کار ګڼم.

مونږ ته په داسې وخت کې حکومت په لاس راغى چې هلته انسانانو د انسانانو په سرو مېخونه ټک وهل، کورونه يې لوټل، يوازي په کابل کې لس باچاهۍ وې او د خپل حکومت په وخت هم ان تر اخېره د افغانستان په يوه څنډه کې په جنګ بوخت وو نو په داسې حالتو کې به زمونږ د ښې حکومتوالۍ په وړاندې خامخا ستونزې وې ولې بيا هم مونږ د ښځو د حقوقو نه مخالف وو او نه يې يو البته يو شى په ډاګه  وايم چې هيڅوک دې هم له مونږ دا تمه نه کوي چې مونږ به ښځو ته د دوى د حقوقو په نوم داسې آزادي ورکړو لکه غرب و امريکا چې ورکړې ده اما کوم حقوق چې اسلام ورکوي هغو ته به مونږ پوره ژمن يو.

دا ته په کوم بنياد وايې چې امريکه له افغانستان خپل فوځونه نه باسي، آيا د هغوى له رسمي ادرسو دې کوم داسې څه اورېدلي؟ هغو خو په کرتو وېلې دي چې دوى به خپل فوځونه وباسي، مونږ خپل دفاعي جهاد د همدې لامله شروع کړى او ادامه مو ورکړې چې دا اشغالګر وشړو او يو اسلامي، خپلواک آزاد و مستقل  هېواد ولرو، امريکايان به اففانستان پرېږدي که بيا نشي ولاړ، په زور يې شړو، دا خاوره د افغانانو ده څه د امريکايانو خو نه ده.

دا مونږ چې 75 سلنه خاوره له خپل تسلط لاندې لرو دا په دې دلالت کوي چې ولس زمونږ سره ده، امريکايانو په 2001 کې وېل چې طالبان ټول له شل زرو زيات نه دي، دا دى اوس راپورونه وايي چې سل زره انسانان دلته په دې جګړه کې وژل شوي دي، که د دوى خبر ريښتيا واى اوس به طالبان په څو ـ څو واره ختم شوي واى، حقيقت دا دى چې دلته افغان ولس له امريکه سره په جهاد بوخت دى او هغوى افغانستان کې د امريکا شتون نه مني؛ له امريکې سره هغه خلک ولاړ دي چې شخصي ګټې يې پورې تړلې دي، د دوى شمېر تر دوه لکه پورته نه دى اما د افغانستان نفوس بيا 35 مليون ته رسيږي، مطلب له دوه لکه پرته نور ټول افغانان د اسلامي امارت تر چتر لاندې د خپلواکۍ لپاره هڅاند دي.

مونږ د يو داسې خپلواک اسلامي نظام لپاره هڅه کووچې د نړۍ له ټولو هېوادو سره ښې اړيکې ولري او د هيچا په ضرر هم نه وي.

د امريکې په زور په افغانانو تپل شوې د کابل اداره هر وخت د سولې په لار کې خنډ جوړوي، تاسو پوهېږئ چې کله هم په نړيواله سطحه د سولې اړوند کانفرنس جوړېږي، هلته زمونږ په شتون د کابل اداره نيوکې کوي ځکه دوى له سولې ډاريږي، دوى پوهېږي که اشغال ختم شي د دوى ناروا ګټې او مزې به ورسره ختمې شي.

داعش د کابل ادارې او امريکه حمايت له ځان سره لري، خپله د کابل رژيم واليان، وزيران او د پارلمان غړي مني او اقرار کوي چې داعش د امريکې او کابل ادارې ګډه پروژه ده، زه په لسګونو داسې مثالونه درکولاى شم چې کله هم مونږ داعشيان له بريد لاندې نيسو د امريکې او کابل طيارې د داعشيانو د ژغورلو لپاره زمونږ مجاهدين بمباروي؛ په دې وروستيو کې به تاسو هم خبر شوي ياست چې مونږ په فارياب کې داعشيان سخت محاصره کړي وو، يوشمېر مو يې ووژل متأصفانه د کابل ادارې تش په نوم اردو بيا همدا محاصره داعشيان په طيارو کې پورته کړل او خوندې ځايو کې يې په خوندورو مېلمستياو ونازول.

هر چاته ښه مالومه ده د کابل اوسنى رژيم په فساد، د ځمکو په غصب، او د زېرمو په لوټلو  کې ښکېل ده.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close