په هيواد کې يوه سوله او درې جګړې

نړويوالې رسنۍ ليکي چې  په افغانستان کې نيابتي جګړه روانه ده چې له روسي يرغل راهيسې افغانانو ته په ميراث کې پاتې ده، هغه مهال هم نيابتي جګړې بلابېل اړخونه لرل او اوس یې هم لري، خو د هغه وخت له مهاله سره يې توپير دا دی چې شرقي بلاک په افغانستان کې له خلپو ملګرو هيوادونو سره جګړه پر مخ بيوله او غربي بلاک يې د نيابتي جګړې د مخنيوي لپاره هم د تبليغاتي او  وسله والې جګړې څخه کار اخست، خو اوس چې په افغانستان کې کومه جګړه روانه ده، په درې برخو ويشل شوې ده، د امريکا په مشري د ناتو پوځونو په موجوديت او مقابل کې وسله واله جګړه، د امريکايي او غربي هيوادونو لخوا د افغان ولس په مقابل کې استخباراتي جګړه چې له بيلابيلو لارو يې پرمخ بيايي.

موږ لومړی وويل چې په افغانسان کې يوه سوله او درې جګړې روانې دي، په دې خپله افغانان او نړيوال قانع او اعتراف پرې کوي، خو هغه څه چې نه پرې افغان حکومت اعتراف کوي، نه يې نړيوال په جګړه کې شميرې او نه ورته غربي رسنۍ د خپلې پاليسۍ له مخې جګړه وايي، هغه تبليغاتي جګړه ده چې د دوو جګړو په پرتله امريکا ته منلې جګړه ده .

اوس به ووايو چې په درې جګړو کې راګيره سوله به څرنګه د کاميابۍ درشل ته ورسيږي او دویم دا چې درې واړه  جګړې په حقيقي توګه روانې دي، خو سوله یې په مجازي شکل سره افغان ولس، د سيمې او نړيوالو مخ ته وړاندې کيږي، همدا او دې ته ورته لاملونه دي چې د تيرو ١٧ کالو راهيسې د جګړې سره يو ځای د سولې هلې ځلې هم روانې دي، جګړه ورځ تر بلې پيچلې او خواوې یې نوې نوې جګړې زيږوي، اما سوله په خپل ځای د جمود په حالت ترسړو واورو هم سړه پاتې ده .

په کومه ورځ چې سپين رنګه ماڼۍ او پنتاګون د افغانستان په اړه جګړه ييزه  پريکړه وکړي، په سبا ورځ خپله امريکايي پوځونه یې عملي کوي او هم یې افغان پوځونو ته د عملي کيدو امر کوي، خو سوله نه عملي کړل شوه او نه ورته زمينه برابره کړل شوه، بلکې امريکا په لوی لاس سره له دې چې مکارانه تبليغ ورته کوي، د سولې ټول امکانات له منځه وړي.

دا مهال په افغانستان کې د سړې سولې په مقابل کې درې جګړې، وسله واله، استخباراتي او تبليغاتي جګړې روانې دي، چې امريکا، ناتو او افغان حکومت پرې په نا ګاهانه توګه اعتراف هم کوي .

د تير اکتوبر د مياشتې په لومړۍ امريکایې رسنيو وليکل چې په سعودي عربستان کې د طالبانو او سعودي چارواکو ترمنځ خبرې روانې دي، افغان حکومت د امريکا په امر پاکستان ته د اکتوبر په دریمه د عالمانو پلاوی وليږه چې د پاکستاني علماؤو او چارواکو سره د سولې په اړه خبرې وکړي، په اندونيزيا کې د علماؤو غونډې ته د بيلابيلو اسلامي هېوادونو علما را وبلل شول چې له غونډې وروسته د اندونيزيا جمهور رئيس (ګويد دود) د ډاکټر عبدالله سره د ليدنې پر مهال پر طالبانو غږ وکړ چې طالبان دې د سولې لار غوره کړي.

د امريکا د مرکزي قوماندانۍ قوماندان جوزوف ووټل، د افغانستان لپاره ځانګړى استازی زلمى خليلزاد، په کابل کې د امريکايي قواوو نوی قوماندان سکاټ مېلر او په کابل کې د ناتو سفير کارنليوز زميرمان په يوه خوله وايي چې طالبان بايد سوله وکړي، خو په حقيقت کې د کاذ بو ويناوو په سيورې کې جګړې ته دوام ورکړي.

په پيکنګ کې جوړې سيانګشان غونډه کې چې پر امنيتي ستونزو د غور او لارو چارو د لټون په موخه جوړه شوې وه، افغان دفاع وزارت اعتراف وکړ چې په افغانستان کې د سولې د هلو ځلو تر څنګ  ٢١ استخباراتي او ترورستي سازمانونه په خپلو فعاليتونو بوخت دي. همدا پوښته را ولاړيږي، چې د دې  ٢١ استخباراتي سازمانونو سرپرستي څوک کوي؟ او د فعاليتونو زمينه ورته چابرابره کړې ده؟

د امريکايي او افغان چارواکو په اعتراف چې په افغانستان کې د ٢١ استخباراتي سازمانونوتر ٨٠٠٠ زيات بين المللي ترورستان په فعاليت بوخت دي، په دې کې افغان ولس او طالب څه ګرم دی چې سوله نه کوي، سوله خو همدې امريکا استخباراتي او ترورستي ادارو له منځه وړې ده، د درې جګړو او ٢١ سازمانونو په مقابل کې به تر واورو سړه سوله څرنګه کاميابه شي؟

په افغانستان کې سوله هغه وخت راتلاى شي چې د همدې ٢١ ترورستي بين المللي سازمانونو لمن له افغانستانه ټوله شي، د دريواړو جګړوڅخه لاس واخستل شي او حقيقي سولې ته، چې هر افغان يې غوښونکی دى، رښتينې  لار برابره کړل شي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close