په وزیرانو ټوغکی مرض ګډ دی

ډاکټر آصف

څو ورځې وړاندې د ولسې جرګې غړو په قاطع اکثریت سره یو شمیر وزیران د بودیجې په لګښت کې د غفلت په تور سلب صلاحیت کړل، خو دا چې په سلب صلاحیت شویو وزیرانو کې یو هم د ګلمرجانیانو او منافقو مقاومتیانو د ډلې مشر صلاح الدین رباني هم راغی نو طبعی ده چې د ولسې جرګې پریکړې بل رنګ خپل کړ، په دې معنی چې دغې منحوسې ډلې له خپل عادت سره سم د ولسې جرګې په اړه ګوډاګي ولسمشر په مخ کې سخت غبرګون وښود، او آن تر دې چې تهدید یې وکړ.

 که حالت بیرته پخوانی ځای ته لاړ نشي نو جمعیت نا اسلامي به په دې اړه غلی پاتې نشي او خپله پریکړه به ډیر زر اعلان کړي.

د پنجشیر ولسمشر ډاکټر عبدالله د اجرائیه ریاست تر سیوري لاندې د یوې اعلامیې په خپرولو سره خپل له شرم نه ډک تهدید آمیزه غبرګون ښکاره کړ او د جمعیت ګوند د خپل ګوندي سیوري لاندې دویمه کرغیړنه اعلامیه خپره کړه، او په تعقیب یې د بلخ ولسمشر عطا محمد نور له بلخ نه دریمه شرمیدلې اعلامیه لکه توغندی د اشرف غني پر سر وتوغاوه، د دې درې توغندیو په توغیدو سره د اشرف غني نه وار پار خطا شو، سملاسي ولسې جرګې ته ورغې او خپله اوږده وینا یې وکړه.

وینا یې ډیر مرموز شکل درلود، نه یې د ولسي جرګي دغه اقدام تایید کړ او نه یې رد کړ او هغه د چا خبره هسی د بوسو لاندې یې اوبه تیرې کړې، دا بیچارګی ډیر ملامت هم نه و ځکه چې مخې ته یې د ولس استازی ناست وو او په څنګ کې یې ټوغکی نیولی جمیعتیان ناست وو، نو نه یې د ولس استازو ته څه استدلال درلود او نه یې ټوغکی وهلو وزیرانو ته څه درمل تجویز کولای شول.

د ولسې جرګې نه په وتلو سره ډاکټر عبدالله له اشرف غني نه پوښتنه وکړه چې د صلاح الدین جان سرنوشت به څنګه شي، که نه کیږي کنه نو خپله پریکړه به اعلان کړي، اشرف غني ورته ډیر اطمنان ورکړ چې ولسي جرګې ته به مکتوب واستوي او صلاح الدین جان به ډیر زر د وزارت پر میراثي چوکۍ خپله غره ولګوي، ځکه چې د هغه پلار برهان الدین رباني هم د قدرت څوکۍ له ځانه سره تر بدخشانه ګرځوله. بالآخره اشرف غني ولسي جرګې ته مکتوب هم واستاوه چې د سلب صلاحیت پورسه ودروي، خو ولسي جرګې ځکه ورته اعتنا ونکړه چې د هغه دغه عمل د اساسي قانون خلاف و.

خو دا چې ټوغکي وهلو اشرف غني آرام نه پریښودو او شپه او ورځ یې ورسره تماسونه نیول او تهدید به یې کولو نو اشرف غني بیا مجبور شو چې اعلان وکړي چې سلب صلاحیت شوي وزیران دې ترهغې خپلې وظیفو ته دوام ورکړي، چې څو پورې سترې محکمې په دې اړه فیصله نه وي کړي او په تعقیب یې قضیه سترې محکمې ته فارورډ کړه.

 ولسي جرګې هم په خپل غبرګون کې تهدید وکړ، چې که سلب صلاحیت شویو وزیرانو خپلو وظیفو ته دوام ورکړ نو بودیجه به پرې بنده کړي او بالآخره یې سترې محکمې ته هم خبرداری ورکړ چې د اشرف غني او د هغه په ټوغکي اخته وزیرانو په طرف فیصله ونه کړي. اوس یې ورته یو ځل بیا تازه خبرداری ورکړ چې دا قضیه سترې محکمې پورې هیڅ اړه نلري نو ځکه باید ستره محکمه په دې قضیله کې هیڅ ډول ګوتې ونه وهي.

ستره محکمه هم له سخت ازمیښت سره مخ شوه او له څو ورځو راهیسې یې له خبرو روژه ونیوله خو نن یې دغه روژه په دې الفاظو ماته کړه چې (قضیه تر پروسس لاندې ده او تر څو چې دغه پروسه تکمیل شوي نه وي نو ستره محکمه رسنیو ته په دې اړه هیڅ هم نشي ویلای) اوس نو ستره محکمه د ډانګ او پړانګ تر مینځ قرار لري او وبه کتل شي چې ستره محکمه به په څه ډول جادو کولو سره ځان له دې تورې بلا نه خلاص کړای شي او کنه د افغانستان سیاست به د ګرداب خواته ټیل وهي.

د شنونکو په اند د افغانستان نظامي حالات هم د پخوا په پرتله مخ پر خرابیدو دي او سیاسي کړۍ یې هم لاس او ګریوان دي، وزیرانو باندې هم ټوغکي مرض حواله شو او یواځینۍ مرجع چې تر اوسه آرامه وه هغه ستره محکمه وه، خو بالآخره دغې محکمې ته هم ټوغکي مرض سرایت وکړ، نو وبه کتل شي چې ټوغکي وهلو ته به کومه مجربه نسخه پیدا کړای شي او که قضائي خودکُشي به وکړي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close