پيښور ښار ته د افغان کډوالو په تګ بنديز لګېدلی

(کابل ټکی کام، ۱۳۹۷، وږی ۲۲)

د پاکستان پښتونخوا ایالت پوليسو پيښور ښار ته د افغان کډوالو د شاوخوا لسو ورځو لپاره پر ورتګ بنديز لګولی دی.

د پيښور مرستيال کميشنر عمران حمید شيخ د دفتر له خوا په خپره شوې خبرپاڼه کې خبرداری ورکړل شوی چې افغان کډوال دې د محرم مياشتې په لومړۍ لسيزه کې په پيښور کې د تګ راتګ څخه ډډه وکړي.

دغه خبرپاڼه چې پرون ماذيګر خپره شوې، زياتوي چې دا بنديز يواځې د افغان کډوالو لپاره نه بلکې د پيښور استوګن به هم له هغو سيمو ځانونه ليرې ساتي کومو سيمو کې چې د شيعه ګانو بارګاوې، او د هغوی د اوسېدو او مذهبي ځايونه وي.

دغه راز په ياده خبرپاڼه کې د موټرسيکل د دوو کسانو پر ګرځېدو، د وسلې پر ګرځولو، په بامونو درېدلو او د جمعې له خطبې او اذان نه بغير د لاوډسپيکر پر کارولو هم بنديز لګول شوی دی.

دغه هېواد کې په وروستيو کې د شيعه ګانو پر جلوسونو بريدونه وشول چې له کبله يې هر کال د هغوی د جلوسونو په ورځو کې په ټول پاکستان کې کلک امنيتي تدابير نيول کيږي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close