پکتیا:ځایي چارواکو په ټاکنو کې په پراخه کچه درغلي کړې

(کابل ټکی کام ۱۳۹۷ لړم ۱)

په پکتیا کې یو شمیر وکیلان او سیمیز خلک وایي، چې د میزان د ۲۸ مه نیټې په ټاکنو کې د دې ولایت زورواکانو او د سیمیزې ادارې مسؤلینو په پراخه کچه درغلي کړې.
له پکتیا څخه یو تن نوماند جمعه ګل افغان وایي، که څه هم د اصولو له مخې دولتي ادارات او چارواکي په ټاکنو کې د لاسوهنې حق نه لري، خو د دې ولایت رهبرۍ د مشخصو نوماندانو په ګټه لاس وهنه کړې.

سرچینې وایي، د قول اردو قوماندان او د څمکنیو ولسوال د د دې ولایت د پخوانۍ وکیلې راضیه سعادت منګل په ګټه په څمکنیو او لجه منګل کې صندقونه ډک کړي،دغه راز په ځاځیو کې هم ورته پیښه د مشخص نوماند په ګټه ترسره شوې او مرکز ګردیز کې هم دا سناریو تکرار شوې ده.
خبر زیاتوي،د دې ولایت یوه پخوانی استازي (ابراهیم غښتلي) د پکتیا په هغو سیمو کې چې طالبان واکمن دي د ښځو د محلاتو په نامه صندوقونه په خپل نوم ډک کړي او سر له اوسه د بریا ادعا کوي.

ګڼو وکیلانو چې درغلي ورسره شوې وه، تیره ورځ په یوه خبري ناسته کې وویل چې،د ولایتي ادارې هغه ولسوالان ،امنيتي مسولین او او ملکي مامورین چې د ټاکنو په ورځ يې درغلیو ته زمینه برابره کړه باید له دندې ګوښه، عدلي او قضايي ارګانونو ته معرفي شي.
دوی زیاته کړه، هغه صندوقونه چې دشپې یا د ورځې له خوا د ولسوالانو او امنیه قومندانانو له خوا د مشخصو نوماندانو په ګټه ډک شوې دي باید د لومړنیو نتایجو وړاندې لغوه اعلان شي.
وکیلانو وړاندیز وکړ چې د ټولې پکتیا رايې باید په مرکزګردېز کې یوځل بیا وشمېرل شي.
باید وویل شي چې په کابل، ننګرهار،او په لویه کچه د ټول هیواد په ټاکنو کې په پراخه کچه درغلي شوې چې د ټاکنو مشروعیت یې تر پوښتنې لاندې راوستی.
تر دې وړاندې د حزب اسلامي مشر او طالبانو په ټینګار سره ویلي و، چې  د ټاکنو برخلیک ټاکونکی لوری بهرني سفارتونه دي او دا انتخابات یې مسخره آمیز او له درغلیو ډک بللي وو.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close