چارواکي: دوه ولايتونه او ګڼې ولسوالۍ سقوط ته نږدې دي

راپورتاژ: الماس خدرخېل —– چارواکي وايي، د فارياب او غزني دواړه ولايتونه احتمالي سقوط ته نږدې شوي او ښايي په نږدې وخت کې د طالبانو لاسته ولوېږي.

د غزني د ولايتي شورا غړی غلام حسين چنګيز وايي، د قره باغ، اندړ او د دغه ولايت يو شمير نورې ولسوالۍ له سختو امنيتي ګواښونو سره مخ دي.

نوموړی وايي، که د غزني امنيتي وضعيت ته جدي پاملرنه ونه شي ښايي ټول ولايت سقوط وکړي او د طالبانو لاسته ولوېږي.

وړمه ورځ د اندړو ولسوالۍ ولسوال محمدقاسم ويلي و چې ولسوالۍ يې د طالبانو له لوري کلابنده ده او که دولت همکاري ونه کړي ښايي ډېر ژر سقوط وکړي.

له بله پلوه طالبانو د اندړ ولسوالۍ په نږدې سيمو کې خطونه غوځولي او د اندړو پوليسو ته يې ويلي (که تسليم شوۍ ژوند به مو په امن کې وي).

په عين حال کې يو شمير حکومتي سرچينې وايي، طالبانو د غزني ښار کلابند کړی او د ښار په څو کيلو مترۍ کې فعالیت کوي چې وخت ناوخت په امنيتي پوستو بريدونه هم کوي.

ويل کېږي، له تېرې يوې اوونۍ راهيسې د غزني ښار شاوخوا له لسو زياتې امنيتي پوستې پوليسو پرېښي او ځينې يې طالبانو نيولي دي.

په ورته وخت کې د فارياب د ولايتي شورا رئيس محمد طاهر رحماني او مرستيال يې صبغت الله سيلاب د دې ولايت د احتمالي سقوط خبرداری ورکوي وايي، له مرکز پرته نورې ټولې سيمې د طالبانو په ولکه کې دي او دمګړۍ د کوهستان، پښتونکوټ، المار، خواجه سبزپوش، شيرين تګاب او دولت اباد ولسوالۍ تر امنيتي ګواښ لاندي دي.

د فارياب ولايتي شورا وايي، له څلورو ولسواليو پرته د دغې ولايت ۹۹ سلنه خاوره باندې طالبان واکمن دي او پاتې سيمې هم سقوط ته نږدې شوي دي.

دوی وايي، له تېرو څو ورځو راهيسې طالبانو خپل بريدونه زيات کړي چې په ترڅ کې يې له پنځوسو زیات عسکر وژل شوي او لسګونه نور طالبانو ژوندي نيولي دي.

له بله پلوه د غور اوسېدونکي وايي، چې د شهرک ولسوالۍ طالبانو کلابنده کړې او ښايي ډېر ژر د طالبانو لاسته ولوېږي.

دغه راز وړمه ورځ د زابل د ولايتي شورا رئيس عطاجان حق بيان وويل، طالبانو په ارغنداب ولسوالۍ کې د پوليسو څو پوستې ونيولې چې دوه ويشت پوليس پکې ووژل شول او اووه تنه نور ټپيان شول.

نوموړي وويل، طالبانو په دایچوپان، مېزانه، ارغنداب، نوبهار او يو شمير نورو ولسواليو کې بريدونه پيل کړي او که پر وخت مرسته ونه شي ښايي دغه ولسوالۍ سقوط وکړی.

له وړمې شپې راهيسې طالبانو په خاص روزګان ولسوالۍ کې په امنيتي پوستو بريدونه کړي چې دوه ستر پوځي مرکزونه او څو پوستې يې نيولي دي.

ازادي راډيو ته يې تېره ورځ سرچينو ويلي و، چې د طالبانو په بريدونو کې د ملي اردو اووه ويشت عسکر وژل شوي او يو شمير نور لادرکه دي.

د خاص روزګان چارواکي هم د دغې ولسوالۍ د سقوط اندېښنه څرګندوي وايي، نظامي پرسونل يې کم شوی او نور عسکر نه دي وررسېدلي که وضعيت همداسې دوام پيدا کړي ښايي ولسوالۍ يې له لاسه ووځي.

طالبانو د نويو پسرلنيو (الخندق) عملياتو له پيل راهيسې د بغلان تاله برفک، د بدخشان کوهستان، د فارياب بل چراغ ولسواليو د نيولو سربيره لسګونه ستر او کوچني پوځي مرکزونه او پوستې هم نيولي چې لسګونه عسکرو ته پکې مرګ ژوبل اوښتې او د هغوی زرګونه ميله وسلې، پوځي مهمات او نقليه وسایط د طالبانو لاسته لوېدلي دي.

دا په داسې حال کې ده، چې د افغانستان د نيم حکومت مشر اجرائيه رئيس ډاکټر عبدالله نن يوې غونډې ته د وينا پر مهال د بغلان، کندز، فاریاب، بدخشان او یو شمیر نورو ولایتونو کې وروستیو ناامنیو ته په اشارې وویل ” خپل امنیتي ځواکونه مو وژنې ته وړاندې کړي، مسئول يې څوک دی؟”

عبدالله وويل، حکومت سيمه ييز پوليس او اربکيان جوړ کړل خو له هغوی يې سالمه استفاده ونه کړه او اوس يې امنيتي ادارې او حکومتي چارواکي هيڅ ملاتړ نه کوي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close