چارواکي: یوه خبریال د ګڼو داخلي او بهرنیو چارواکو ژوند بچ کړی

(کابل ټکی کام ۱۳۹۷ تله ۲۹)

د کندهار له برید څخه د څو ورځو په تیریدو سره اوس د دې برید نور اړخونه ورو،ورو ښکاره کیږي.

د کندهار ځایي چارواکي وایي، چې د تیرې پنجشنبې د خونړۍ پیښې اصلي طرحه کونکي چې د امنیتي ګارډ یو ساتونکی و، له سیمې وتلی دی.
په ټولنیزو چارو کې د کندهار د والي مرستیال حاجي اغا لالی دستګیري وايي؛ د والي یو ساتونکی چې بصیر احمد نوميده او له څو کلنو را په دې خوا یې د والي د ګارډ په توګه دنده تر سره کوله، شاوخوا یوه نیمه میاشت مخکې یې  برید کوونکی کس چې نوم یې ګلبدین ښوول شوی، په خپل اعتبار چې ګواکې د خور زوی یې دی راوستلی او د والي د ساتونکي په توګه یې په دنده ګومارلی و.
اغا لالي پژواک ته ویلي، بریدګر په یوه نیمه میاشت کې بشپړ باور ترلاسه کړی و او آن د والي د وروستۍ دروازې پیره داري یې هم ترلاسه کړې وه.

د ذبیح الله الله (ابودحانه) په نوم هغه نفوذي عسکر(طالب) چې جنرال رازق یې وواژه

لالی وایي، د برید طرحه کونکي (بصیر احمد) کس د پنجشنبې په ورځ په ولایت مقام کې د غونډې له پيل کېدو نیم ساعت مخکې په دې بهانه اجازه اخیستې او تللی چې ګواکې په کور کې سخته ناروغي لري.

نوموړی زیاتوي، نصیر احمد څو ورځې وړاندې کورنۍ هم له سیمې ایستلې وه او تر برید سمدستي وروسته یې د طالبانو تر حاکمیت لاندې ساحې ته ځان رسولی او تر هغه وروسته یې له ډیورند کرښې پورې غاړه اوښتی دی.

د دستګیري په خبره؛  بریدګر په داسې حال کې چې میلر او افغان چارواکو خدای پاماني اخیسته، د انارو کارتنونه راوړي او هم مهاله یې لومړی پر امنیه قوماندان جنرال عبدالرازق او بیا نورو چارواکو ډزې کړې دي ـ د امنیې قوماندان یوه مرمۍ پر زړه لګیدلی او دوه پښو ته او روغتون ته په رسیدو سره یې ساه ورکړې.
اغالالی وایي، بریدګر غوښتل چې د سکاټ میلر په ګډون ګڼ شمیر مشران ووژني خو د ملي تلویزیون خبریال سلیم انګار پرې په تش لاس حمله کړې چې له دې سره نورو سرتیرو پرې ډزې کړې او ځای پر ځای یې وژلی دی.
خبریال سلیم انګار هم د بریدګر په ډزو وژل شوی خو د والي، سکاټ میلر او ګڼو چارواکو ژوند یې بچ کړی دی.

په دغه پیښه کې د کندهار امنیه قوماندان جنرال عبدالرازق، د ملي امنیت رییس جنرال عبدالمومن حسین خېل او کامره مېن سلیم انګار چې “ خپله یې ځان د مرګ خولې ته ورکړ “وژل شوي او والي، ویاند یې او درۍ بهرني ځواکونه ټپیان دي.

د ملي امنیت شورا وایي، په دې برید کې د پاکستان لاس درلودل نه شي تائیدولی او دا تر وخت مخکې کار دی

طالبانو د بریدګر انځورونه او مستنده ویډیو خپره کړې او د برید پړه یې منلې ده.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close