ډنفورډ: امريکا د خپل امنيت لپاره افغانستان کې پاتې کېږي

(کابل ټکی کام، ۱۳۹۷، لیندۍ ۱۷)

د امريکا لوی درستيز جنرال جوزف ډنفورډ وايي، امريکا د خپل امنيت خونديتابه لپاره په افغانستان کې پاتې کېږي.

ډنفورډ ويلي، که امريکا غواړي يو ځل بيا د يوولسم ستمبر پېښه تکرار نه شي نو بايد متحده ايالات په افغانستان کې خپل نظامي حضور دوامداره وساتي.

نوموړي پرون د جمعې په ورځ واشنګټن پوسټ ورځپاڼې ته په يوه مرکه کې وويل، چې له افغانستانه د بهرنيو ځواکونو وتل نه د افغانستان، نه د سيمې او نه د امریکا په ګټه دي نو بايد د بهرنيانو د وتلو په اړه بايد په هوښارۍ ګامورنه پورته شي.

ډنفورډ اندېښنه څرګنده کړه، که امريکا له افغانستانه ووځي نو ښايي دغه هېواد يوځل بيا د وسله والو په پټنځای بدل شي.

تر اوسه طالبانو د ډنفورډ د وروستيو څرګندونو غبرګون نه دی ښودلی خو څو ورځې مخکې يې د امریکا د دفاع وزير جيمز متيس د هغو خبرو په غبرګون کې چې (د افغانستان شخړه حل کول غواړي خو له دغه هېواده نه ووځو) ويلي و چې افغان مسلمان او غيرتي اولس کلک تصميم لري چې ” امریکايي اشغالګر ځواکونه به په دې مجبوروي چې له افغانستانه ووزي”.

امریکا په وروستيو کې هڅې پيل کړي چې د افغانستان جګړه پای ته ورسوي او له دغه هېواده خپل ځواکونه په امن توګه وباسي چې د همدې لپاره يې د زلمي خليلزاد په مشرۍ يو پلاوی ټاکلی او طالبانو سره يې په دې اړه څو ځلې ملاقاتونه هم کړي دي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close