ښځه په اسلامي ټولنه کې

لیکنه : شرافت تسل

په دې کې هیڅ شک نشته چې داسلام مبارک دین دجاهلیت په وړاندې په هر وخت مباریزه کړې، او انسانیت ته یې نجات ورکړې، د اسلام مبارک دین څخه وړاندې ښځې ته په درنه سترگه نه کتل کیده اودښځې نه یواځې د جنسې اله په توگه استفاده کیده ،او دپست او بیکاره موجود په څیریې گڼله ، او ځینې یې په انسانیت هم شکمن وه ، په داسې یو حالت کې اسلام راغلو چې دبشر نیم نسل دتباهۍ سره مخ وه ، اسلام ښځو ته ژوند ورکه ، اسلام ښځه دټولنی جوړونکې وگڼله او هغه یې دکورنیکمرغې ، دنارینه جامه وبلله ….

نو اوس غربیان غواړي چې د ښځو د حقونو په غلونکې شعار نه په استفادې ښځه بیا د تیر جاهلیت ته ور وگرځوي او دهغې نه دهغې حقونه واخلي .

مولانه مودودي رح لیکي :

دلویدیځ کولتورپوهان چې د((ښځودځغلولو)) کوم خوځښت رالاړولوسره زموږ دکورونوپه ړنګولو پسې راخیستې ده اود دې لپاره يې لومړی داربابانواو د شتمنوخلکو کورونه نښه کړي ول اود هغوی په مرسته يې د منځنۍ اوټيټې طبقې ښځې د تفریح په نامه له کورونو راویستوسره د محفلونو ډول پرې جوړوي چې په دې سره دنارینه هوس په دام کې راښکېلوي اودې ناوړه لمسونو ته د ښځود پرمختګ او د ښځو اونارینه وترمنځ د مساوات په څېر ښکلي نومونه پرېږدي داسلامي ټولنو اخلاقي اوټولنیزو ارزښتونو دپام اړولو لپاره یهودي ذهنه خلکو څومره ژور فکر کړی.

تراسلام د مخه په ټولنه کې ښځوته په درنه سترګه نه کتل کېده بلکې په ډېرسپک نظر ورته کتل کېدل ان تردې چې نجونې به ژوندۍ ښخول کېدې دڅارویو په شان په بازارونو کې خرڅېدلې، د نر تابع وې، کوم ځانګړی مقام اوحیثیت يې نه درلود اونه ورته کوم ټولنیز حق ټاکل شوی و .

اسلام ترهرڅه له مخه د ښځې د محکومۍ پر وړاندې مبارزه وکړه اوښځې ته يې په ټولنه کې درنښت ور وباښه اوپه څنګ کې يې ورسره دا اعلان هم وکړ چې ټول انسانان دیوالله جل جلاله بنده ګان دي، نر او ښځه دواړه یوشان د عزت او درناوي وړ دي .

اسلام ښځوته مالي او قانوني حقوق د سړیو په څېر ورکړي، یعنې په دې حقوقو کې ښځه له سړیو سره یوشان ده، لکه ښځه د شتمنۍ واکواله کېدای شي ،خرڅ کولی شي، بدله اخیستلای شي، هر ډول دعوت کولی شي اوهمداشان د خلع حق هم ورکړل شوی اوپه دې کې څه شک نشته چې ښځه له سړیو سره په انساني حقوقو کې برابره ده، ښځه ځانګړې پېژندګلوي لري، خوله منفي پلوه قدرت له نارینه وو جلا کړې ده.

همداشان داسلام کورني نظام نرته د برترۍ په ورکولو سره ښځې ته نفقه، کور، مهر، خوندیتوب، د ښوونې او روزنې حقوق پرسړیو دي اوکه نارینه د دې حقوقو پرځای کولو کې سستي وکړي نوښځه کولای شي چې په قضا کې پر دې سړي عریضه وکړي  او خپل سالم او قانونې حقوق ترلاسه کړي.

دغه راز اسلام سړي دې ته هڅولي چې د ښځوحقوق پرځای کړي او په دې سربیره یې ورته  د ښه سلوک امر هم کړی دی .

په حدیث شریف کې راځي:

په مومنانو کې ترټولو بشپړ ایمان لرونکي انسانان هغه څوک دي چې ښه اخلاق ولري او له خپلو ښځواوبچو سره مینه اومحبت ولري ((ترمذي مخ ۱۱))

اوهمداشان داسلام په ټولنيزنظام کې ښځو ته په کور کې دندې سپارل شوي او سړیو ته له کوره بهر؛ نوځکه د دواړو د کار لپاره په ساحه او دندوکې لوی توپیر شته، د ښځې پرغاړه یې دکورنۍ خرڅ اواړتیاوو د پوره کولو پرځای اسلام ښځې ته معاشي ضمانت ورکړی او په ټولنه کې یې ورته له ټولنیز پلوه لوړه مرتبه وربښلې ده، ځکه چې ښځه دکور واکواله او اداره کوونکې ده اوهمداشان ښځې ته نه دي پکار چې د بهرنۍ نړۍ د جوړولو په تکل کې خپل کور وران کړي، یعنی د خپل میړه پرته نامشروع اړیکې ونیسې او همداشان په قران کریم کې الله تعالی فرمایلې:

(هُنَّ لِبَاسٌ لَكُمْ وَأَنْتُمْ لِبَاسٌ لَهُنَّ)[سورة البقرة:۱۸۷)

ژباړه: (هغوي ( مېرمنې ) ستاسو لپاره جامې او لباس دی او تاسو د هغوی لپاره جامې او لباس یاست.)

امام ابوجعفر الطبري رحمه الله په تفسیر الطبري(جامع البيان) او امام السمرقندي رحمه الله په خپل تفسیر (بحر العلوم) کې فرمايي: د لباس څخه مراد سکون دی، یعني دا چې ښځې ستاسو سکون او تاسو د هغوی سکون یاست.

نو داسلام له نظره ښځه د بنډارشمع نه بلکې دکور څراغ  او د میړه سکون دی ،چې  بنسټيزه دنده یې د خپلوکوچنیانو ښوونه او روزنه اوپه هغوی کې لوړاخلاقي صفتونه پیداکول دي.

اسلام وايي که ښځه تر کورنۍ دندې پرځای کولو وروسته که دخپلو حالاتو اوذوق له پلوه د ژوند په نورو ډګرونو زړه راښکونتیا څرګنده وي کولای شي، خو داسلام په ټاکلي چوکاټ کې یې د ښځې ټول حقونه د قانون له مخې خوندي کړي دي.

اوله بل پلوه ټولنې ته له ښځې سره دښه چلند امرکوي ځکه چې اسلام په ټولنه کې داسې چاپېریال رامنځته کول غواړي چې ښځه پکې له هر پلوه د عزت او درنښت ژوند ولري، په ټولنه کې ښځې څلور څرګنده بڼې شتون لري مور، لور، خور، او د ښځې په بڼه او اسلام د ښځې دې ټولو بڼو ته ارزښتمنده مرتبه وربښلې، په دې ټولو بڼو کې يې د مور بڼه ترټولوغوره ګڼلې

(الجنة تحت اقدام الأمهات)[رواه مسند الشهاب)

ژباړه: رسول الله صلی الله علیه وسلم فرمايي: ( جنت د میندو تر قدمونو لاندي دی)

(په اسلامي ټولنه کې دنامحرمو ښځو اونارینه و ګډ تعلیم، گډ مجالس او یو ځاې کار کول منعه کړي او دا يې د جاهلي ټولنې کارونه بللي دي، الله تعالې فرمایې ( وَقَرْنَ فِي بُيُوتِكُنَّ وَلَا تَبَرَّجْنَ تَبَرُّجَ الْجَاهِلِيَّةِ الْأُولَى….. )

ژباړه : ((په خپلو کورونو کې مېشتې اوسئ او د تېر جاهلي دور غوندې سینګار کړې بې ستره مه ګرځئ ……))

په ټولنه کې د ازادانه ګډوډۍ قطعاً اجازه نشته ځکه په کومو ټولنو کې چې داسې ازادي ورکړل شوې ده نو ډیرې بدې پایلې يې ترسترګو شوې دي .

کفار او نور بې دینه خلک که مسلمانان ملامت بولي نو په دې خبره هم ورته ځان پوهول په کاردي چي په مخکني  جاهليت کې د ښځي مقام او مرتبه څه وه او اوس په هغو ټولنو کې څه ده چې تراوسه یې اسلام د خپل ملي دین په توګه نه دی منلی؟ له اسلام څخه مخکې په عربي، رومي او يوناني جاهلي ټولنوکې ښځې ته په سپکه سترګه کتل کېدل، په  دوی کې د نجلۍ زېږون د شرم او پيغور خبره وه او له همد ې وجي  به یې ژوندۍ خښولې.

قرآن کريم په دوی کې د ښځي بد حالت داسې بيانوي: وَإِذَا بُشِّرَأَحَدُهُم بِالْأُنثَى ظَلَّ وَجْهُهُ مُسْوَدًّا وَهُوَ كَظِيمٌ ٥٨ يَتَوَارَى مِنَ الْقَوْمِ مِن سُوءِ مَا بُشِّرَ بِهِ  أَيُمْسِكُهُ عَلَى هُونٍ أَمْ يَدُسُّهُ فِي التُّرَابِ  أَلَا سَاءَ مَا يَحْكُمُونَ ٥٩. ژباړه : ا و كله چې په دوى كې یو ته د لور زېرى وركړل شي نود هغه مخ تك تور شي، په داسې حال كې چې له قهره ډك وي له خلقو څخه پټ ګرزي د هغه څه د بدۍ په وجه چې ده ته يې زېرى وركړل شوى دى (او سوچ كوي چې)، ایا دى دغه (لور) سره له ذلته وساتي اوکه په خاورو كې یې خښه کړي، خبردار شئ! ډیره بده ده هغه فیصله چې دوی یې کوي..

په وړاندنیو ټولنو کې ښځه له ميراث څخه بــې برخې وه  اوميراث صرف دنارينه حق ګڼل کېده. په اروپایي ټولنوکې هم ښځو ته په سپکه ســترګه کتل کېدل. د اروپا د کليسا پاپانو به ويل ( ښځه يو ذليله او نجس حيوان دى ). په ١٨٠٥ ميلادي کال کې اروپايانو په خپل قانون کې ليکلي وو (نارينه کولی شي چې خپله ښځه خرڅه کړي) .په اوسنۍ غربي نړۍکې هم ښځې ته ترهغه وخته پـــورې په درنه سترګه کتل کېږي چې ځوانه وي او کله یې چې  ځواني ختمه شي بيا ورته په سپکه سترګه کتل کېږي او په ټولنه کې  هيڅ حيثيت نه لري .په اوسني غرب کې زړې ښځې دحکومت لخوا په ډېر لږ معاش باندې وخت تيروي….

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close