کابلوف: امریکا افغانستان کې ماته ده، ځواکونه ايستل يې په ګټه دي

(کابل ټکی کام، ۱۳۹۷، سلواغه ۲۵)

د افغانستان لپاره د روسيې ځانګړی استازی ضمير کابلوف وايي، امریکا افغانستان کې په بشپړه توګه ماته خوړلې او له دغه هېواده يې ژر تر ژره د ځواکونو ايستل په ګټه دي.

کابلوف دغه څرګندونې له اسوشيټېډ پرېس خبري اژانس سره په مرکه کړي.

نوموړي ويلي، د دغه لوبې په پایله کې به بيا هم امریکا د خپلو ځواکونو ايستلو ته اړ کېږي، دا د امريکا د مشرتابه د پريکړې پورې اړه لري، که څومره په دغه هېواد کې پاتې شي هغومره به يې زيات لګښت او مصارف وشي.

کابلوف ويلي، دا د امریکا په ګټه ده چې له افغانستان څخه ژر تر ژره ووځي او له جګړې وروسته افغان حکومت سره مالي مرستې وکړي.

امریکا له تيرو څو مياشتو راهيسې طالبانو سره د افغانستان د مسلې پر حل او له دغه هېوده د ځواکونو د ايستلو په اړه مذاکرات پيل کړي چې د طالبانو په وينا د فبرورۍ په اتلسمه نيټه راتلونکي پړاو مذاکرات په پاکستان له امريکايي پلاوي سره کېږي او د همدغه مياشتې په ۲۵ به په دوحه کې وي.

د امريکا ولسمشر ډونالډ ټرمپ تر دې مخکې ويلي و که امریکا طالبانو سره يوې پريکړې ته ورسېږي نو ټول ځواکونه به له دغه هېواده وباسي.

خو وړمه ورځ د امريکا د سنا مجلس د پوځي خدماتو د کمېټې مشر جېم اينهاف وويل، ډونالډ ټرمپ سره يې له افغانستانه د ځواکونو د ايستلو په اړه خبرې کړي او هغه ورته ويلي شرایطو ته په کتو به خپل ځواکونه له دغه هېواده وباسي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close