کابل: برید پای ته رسېدلی- طالبان وايي په دوی پورې اړه نه لري

(کابل ټکی کام، ۱۳۹۷، زمری ۳۰)

د کابل ښار د ولسمشرۍ ماڼۍ ته څېرمه سيمه په داسې حال کې بریدونه شوي چې دغلته د اختر مراسم روان و.

ويل کېږي، دغه راکټونه د ولسمشر غني د وينا سره سم د اختر د لمانځه له ادا کولو وروسته په شاوخوا سيمو کې ولګېدل.

د کابل د امنيه قومندانۍ وياند حشمت ستانکزی وايي، یو توغندی د دوهمې حوزې اړوند اماني ليسې ته څېرمې سيمې څخه توغول شوی چې په اړه يې پلټنې روانې دي.

عيني شاهدان وايي، د پېښې ځای ته نږدې شاوخوا پنځه راکټونه لګېدلي دي.

يوې سرچينې طلوع نيوز ته ويلي، وسله والو د عيدګاه مسجد ته څېرمه له ډاينا موټر څخه په استفادې د ولسمشرۍ د وينا پر مهال د اختريزو مراسمو پر غونډه د راکټونو بريدونه وکړل.

د سرچينې په وينا، په سيمه کې د وسله والو او پوليسو تر منځ نښته روانه ده.

يوې بلې باوري سرچينې کابل ټکی کام ته وويل، چې د وسله والو بريدګرو شمير درې تنه دی او د عیدګاه مسجد ته څېرمه يوې نږدې ودانۍ ته ختلي او له هغې ځايه يې پر غونډې د راکټونو بریدونه پيل کړي دي.

کابل بريد جزيات:

که څه هم د کورنيو چارو وزات وياند نجيب دانش په لومړنيو معلوماتو وويل چې بریدکوونکي درې کسان دي او د امنيتي ځواکونو سره په نښته کې له منځه تللي خو د پېښې ځای ته نږدې سرچينې د بریدګرو شمير شپږ تنه ښيي.

د دانش په وينا، د بريدګرو له لوري په لومړيو کې څو راکټونه د کابل ښار دوهمې، لسمې او شپاړلسمې حوزې په مربوطاتو کې ولګېدل.

تازه د لومړۍ امنیتي حوزې اوسېدونکي او عیني شاهدان وایي عیدګاه جومات ته څېرمه اوس هم له بریدګرو سره نښته روانه ده.

د لومړۍ امنیتي حوزې امر محمد رحیم غرني بي بي سي ته وویل، بریدګر د لومړۍ ناحیې اړوند د “کب پلورنې” په یوه سرای کې ځای پر ځای شوي وو چې د امنیتي ځواکونو له خوا ووژل شول.

طالبانو د کابل د ننې ورځې برید کې لاس لرل رد کړي او وياند يې ذبيح الله مجاهد په خپله ټويټرپاڼه ليکي: “د کابل د نن ورځې بریدونه د اسلامي امارت د مجاهدینو پورې اړه نه لري”.

لا هم په دغه بريدونو کې د اوښتو تلفاتو په اړه کره معلومات نه دي رسنيز شوي.

تر اوسه د دغه بريد مسئولیت چا په غاړه نه دی اخیستی.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close