کابل کې د مسعود تلين نمانځل، وحشت او د چارواکو مسووليت

راپورتاژ: الماس خدرخېل—

د وږي مياشتې اتلسمه چې د شمال ټلوالې د قومندان (مسعود) د وژلو سره برابره ده او حکومت دغه ورځ د (شهيدانو اوونۍ) نومولی ده.

هر کال په دغه ورځ د مسعود پلويان له دولتي وسایطو په استفادې په کابل  له وسلو سره راووځي، نمايشونه کوي ډزې کوي چې د کابل د خلکو په وينا په دغه ورځ د کابل ښار د (وحشت او دهشت ) بڼه غوره کړې وي خو امنيتي مسوولين يې د مخنيوي په اړه هيڅ اقدام نه کوي.

پرون هم د مسعود تلين د نمانځنو په هدف د هغه پلويان په بې نمبر پلیټه موټرو کې د وسلو سره د کابل ښار واټونو ته راوتلي و او هره خوا يې ډزې کولې.

د افغانستان د عامې روغتیا وزارت ویاند وحید مجروح وويل، په دغه هوايي ډزو کې تر اوسه ۲۲ تنه ټپيان شوي او د درملنې لپاره د کابل روغتونونو ته لیږدول شوي دي.

په تير کې هم د شمال ټلوالې کسانو د احمد شاه مسعود د وژنې پر ورځ کابل ښار کې ورته ډول نمایشونه- ډزې کړي چې له کبله يې عامو خلکو ته مرګ ژوبله اوښتې ده.

ښاريان وايي، په کابل کې تيره ورځ داسې وحشت او دهشت تير شوی چې نن هم ډيری ښاريان د وحشتونو له ويرې په کورونو کې پاتې دي او له ډاره خپلو کارونو ته نه دي وتلي.

د کابل یو تن اوسېدونکی زیارمل وايي، د تيرې ورځې وضعيت دا په ډاګه کړه چې لا هم امنيت نشته او د خلکو ځان او مال خوندي نه دی ځکه (دولتي ځواکونو دا جرئت نه شو کولی څو غير مسووله وسله وال او بې نمبره موټر ودروي.)

دوی وايي، دغه غير مسووله وسله والو د جمعيت ګوند درې رنګه بيرغ له ځان سره ليږداوه او د عامو خلکو د سر مال هيڅ پروا يې نه ساتله.

د حبيب الرحمن ابراهيمي په نوم د اجرايه رياست يو کارمند وايي، د مسعود پلويانو د کابل ښار په يوه وحشت بدل کړ.

که څه هم د کورنيو چارو وزارت ويلي و چې د مسعود تلين د نمانځې پر وخت امنيت اخلالوونکي او سرغړوونکي به له جدي چلند سره مخ شي خو د ميروس په نوم یو دوکاندار وايي، په کابل کې ځای ځای امنيتي ځواکونه تر سترګو کېدل خو دومره جرئت يې نه شو کولی څو د دغه غير مسووله وسله والو د ډزو مخه ونيسي او يا له هغوی پوښتنه وکړي ځکه که هغوی دا کار کړی وی ښايي د وسله وال غبرګون سره مخ شوی وی.

ښاريان وايي، د دغو کسانو تر شاه خامخا حکومتي قوي کړۍ شته چې هيڅ امنيتي ځواک يې مخه نه شي نیولی او په (کابل کې دا ډول وحشت جوړول د حکومت مشرتابه او مسوولينو ته پيغور دی.)

د دغه ټلوالې يوه قومندان د تلين ورځې له نمانځنې دوه ورځې مخکې په یوه ويډيو خبرداري کې د کابل امنيه قومندان ته اختار ورکړ (که د يادو وسله والو د مخنيوي په باره کې يې لږ حرکت هم وکړ  نو بار او بستره به دې درټوله کړم او کابل به هم درنه ونيسي.)

د ګډ حکومت اجرائیه مشر ډاکټر عبدالله د لویې جرګې په خیمه کې په خپله وینا کې د قومندان احمدشاه مسعود د پلویانو د موټرو په کاروانو کې د ځوانانو له خوا د ډزو غندنه وکړه او ویې ویل، چې دا د قومندان مسعود د تلین د لمانځلو لار نه ده.

که څه هم د کابل د پوليسو وياند حشمت ستانکزی وايي، امنيتي ځواکونو سل کسان، لسګونه ميله وسلې او ديرش موټر نيولي چې د کابل امنيت ته يې ګواښ جوړ کړی و.

خو امنيتي سرچينې وايي، نيول شوي کسان بیرته د اړيکو له لارې خوشې شوي او ښايي د هغوی نيول شوي موټر او وسلې هم بيرته وسله والو ته وسپارل شي.

د شنونکو په باور دا چې حکومت په کابل ښار کې د ښکاره وسله والو مخنيوی نه شي کولی نو هغه غير مسووله وسله وال به څنګه کنترول کړي چې وخت ناوخت يې د ولسمشر په ويناګانو کې ذکر کېږي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close