کندز- خوست: شپنيو عملياتو کې ملکیانو ته مالي او ځاني زیان اوښتی

(کابل ټکی کام، ۱۳۹۷، کب ۲۶)

د کندز ولايت په چهاردرې او د خوست ولايت باک ولسوالۍ کې ګډو ځواکونو عمليات کړي چې پر مهال يې ملکيانو ته مالي او ځاني زيانونه اوښتي دي.

راپورونه وايي، دغه عملیات تيره شپه د چهادرې ولسوالۍ په خلازيي سيمه کې شوي چې په ترڅ کې يې د ملکي خلکو ګڼ شمير کورونه ويجاړ شوي، مالونه يې عملياتي عسکرو چور کړي، د خلکو شخصي وسایې يې له منځه وړي دي.

ځايي سرچينې وايي، د عملیاتو په پایله کې عملیاتو عسکرو درې تنه عام کليوال وژلي او څلور تنه نور يې ټپيان کړي دي.

د سیمې اوسېدونکي وايي، ګډو ځواکونو اته عام کليوال هم له ځان سره د بنديانو په توګه وړي دي.

دغه راز په يوه بل خبر کې ويل شوي چې شپنيو عملياتو پر مهال د باک ولسوالۍ په سمن خيلو سيمه کې هم ملکي خلکو ته زيانونه اوښتي دي.

د خوست ولايت خبري سرچينې وايي، د عملياتو پر مهال د حاجي لونګ جان په نوم يو کليوال وژل شوی او د چاپې عسکرو د پلټنو پر مهال عام خلک زورولي او د هغوی مالونه يې چور کړي دي.

په وروستيو کې د ګډو ځواکونو شپني عمليات زيات شوي چې تر ډيره پکې ملکي ځايونه هدف ګرځي او مرګ ژوبله يې هم ملکيان ګالي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close