کندوز: د دولتي ځواکونو په هاوان بريد کې لس ملکيانو ته مرګ ژوبله اوښتې

(کابل ټکی کام، ۱۳۹۷، چنګاښ ۳۰)

د کندوز ولايت په قلعه ذال ولسوالۍ کې د دولتي ځواکونو په هاوان بريد کې د مېرمنو او کوچنيانو په ګډون لس تنو ملکي وګړو ته مرګ ژوبله اوښتې ده.

پېښه نن غرمه د يوولس بجو په شاوخوا کې د يادې ولسوالۍ مربوط په آق تېپې سيمه کې رامنځته شوې ده.

په ولايتي شورا کې د قلعه ذال د خلکو استازی سيد اسدالله سادات وايي، د هاوان دغه مرمۍ د دولتي ځواکونو له لوري توغول شوې او په يوه کرنيزه ځمکه کې لګېدلې چيرته چې ښځو او ماشومانو په پټيو کې کار کاوه.

د سادات په وينا، په دې پېښه کې دوه مېرمنې وژل شوي او د ماشومانو په ګډون اته تنه نور ټپيان دي چې ټول ولسي خلک دي.

دا په داسې حال کې ده چې تېره ورځ هم بهرنيو ځواکونو د دغه ولايت په چهاردرې ولسوالۍ کې درې کورونه بمبار کړل چې پکې د ښځو او ماشومانو په ګډون له شلو زيات ملکي وګړي ووژل شول.

ډير کرته دولتي او بهرني ځواکونه له طالبانو سره د جګړو پر وخت پر کليوالو او ګڼ ميشتو ولسي ځایونو د هاوان، توپونو، درنو وسلو او بمباريو څخه کار اخلي چې له کبله يې په لوړه کچه ملکي تلفات رامنځته کېږي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close