که داسې حال وي.. د کابل سقوط ته ورځې شمېرئ

 نعمان لطیف

څلور ورځې وړاندې طالبانو دغزني ولایت په مرکز برید وکړ. دطالبانو منظم، توند او ناڅاپه برید عسکر سخت وارخطا او په تېښته مجبور کړل.

ځینې سلامي شول، ځینې وتښتېدل او ځینې دخپلې کمعقلۍ او سرتمبگۍ له کبله ووژلای شول.

دوی تمه درلوده چې څو شېبو کې به یې کومکي عسکر څنگ ته ودریږي، مگر نن څلورمه ده چې طالبان پر غزني واکمن دي، او دخپل پلان له مخې مهم ځایونه نیسي، او عسکر یا تسلیمیږي او یا وژلای کیږي.

دغزني ښاریان (چې اوس دسخت بمبار او ذهني کشمکش ښکار دي) له افغان کلتور او جغرافیې د ناخبره، بې کیفیته، او بلواکه ولسمشر او ادارې دمنلو سزا گالي.

هلته غزني دطالبانو لاسونو ته لوېدلې دی، لسگونه عسکر یو پر بل پسې وژلای کیږي، لارې کوڅې یې له جسدونو ډکې دي چې دتعفن له لاسه یې ښاریانو ته تنفس ستونزمن شوی دی مگر مفکر (!) ولسمشر په ارگ کې دټوپکسالارانو فرمایشات پوره کوي، غونډې دي، چکچکې دي، خنداوې دي، قهقهاوې دي.

دملا تره خېل کوتکیانو دټاکنو کمېسیون مخې ته لویه خېمه وهلې ده، د امرخېل پلویانو بېل ډانډس پیل کړی دی، د بل ایستل شوي نوماند پلویانو بل قسم اتڼ ته ملاوې تړلي ده.

سناتوره فریده کوچۍ حکمتیار صیب په راکټیار مخاطب کوي او په کور دډبرو دباران گواښونه ورته کوي، دقیصاري او عطا، دوستم بدمعاشي او د اشرف غني بېوسي کابو تمامې نړۍ ولېدله.

اوس چې په ایران دنړیوالو بندېزونو په ترڅ کې دډالرو دخرېدارۍ بندیز لگېدلای دی، په کابل کې ناست گڼ شمېر وکیلان، او چارواکي لگیا دي ډالر اخلي او ایران ته یې قاچاق کوي؛ ایران ته دډالرو پرېمانه قاچاق به د افغانیو لیږ ډېر پاتې حیثیت هم له منځه یوسي.

ولس ته فقط همدا یوه خبره خوله کې ورکړل شوېده چې هر څه پاکستان کوي، په هر څه کې دپنجاب لاس دی او ……..

تره خېل مُلا ته پنجاب وایي چې خېمه ووهه؟ اجرائیه ریاست او شمال ټلوالې ته پاکستان وایی چې له نیمایي زیات پښتانه نوماندان له لیسته وکاږه چې هېواد کې غوبل جوړ وي؟

هلته چې غزني کې ددې هېواد ځوانان په لمبو کې سوځېږي؛ ډاکټر اشرف غني ته پاکستان وایی چې ارگ کې دځوانانو د ورځې لمانځلو تابیا ونیسه؟!

نیویارک ټایمز وړمه ورځ راپور ورکړ چې افغان چارواکي تر ټولو پست، ذلیل او بې شرم چارواکي دي؛ باور وکړئ ماته یې دا خبر پیغور ښکارېده، زور یې راکړ، اما نن وپوهېدم چې رښتیا یې ویلي دي او په حقیقت کې همداسې ده.

اوس دستي له ننگرهاره تازه راپورونه دا دی چې له لیست ایستل شویو نوماندانو گواښ کړی که چېرې یې نوم، بېرته ځای پر ځای نشي دننگرهار د وکیلانو شورا دروازه به وتړي.

دلته د هرې ناخوالې تر شاه نظام ولاړ دی، د هرې ناروا پشت باني چارواکي کوي، هر زورواکی دنظام له لوړو څوکیو پر شاه ټپول کیږي خو چې طالبان ددوی له بې کفایتۍ گټه پورته کړي او چانس ووهي، دوی بیا کومي خلاص کړي چې گویا پاکستان مو نه پرېږدي ارام ژوند وکړو.

پاکستان مازې ددوی لاس پاک دی، خپله ټوله مرداري په پاکستان وراچوي، درحالیکې دوی هر یو پردیو ته کار کوي، د پردیو په ډاډ په چوکۍ ناست دي او د هېوادوالو په سرنؤشت لوبې کوي.

طالب چې دملت لپاره رحمت دی، شکر ددوی لپاره الهي عذاب دی چې هر وخت یې پرې ورنازلوي؛ که طالبان نه وای خدازده دوی به پر موږ کومې نخرې کولای؟

موږ همداسې ښه یو چې خپل مسیحا مو غلط کړی دی، او ځانونه مو د داسې بې کفایته او بې هویته بلاوو منگولو ته سپارلي دي چې پر موږ له بل شویو اورونو نه خپلې سیگریټې بلوي.

دفاع وزیر وایي په غزني کې زموږ سل عسکر وژلای شوي دي، او په جگړو کې دسلو عسکرو مړینه عادي خبره ده.

د اردو سل وژلای شوي ځوانان جناب وزیر ته معمولي او عادي ښکاري. دا سل ځوانان هغه ؤ چې دوی کرایه کړي ول او دهمدوی دگټو ساتنه یې کؤله مگر دوی دومره سپین سترگي او بې حیا دي چې دسلو عسکرو مړینه معمولي گڼي.

په حقیقت کې موږ دنړۍ د تر ټولو ارذالو واکمنانو رعیت یو، او ددوی چې دا حال وي، لېرې نه ده چې ډېر نېږدې وخت کې طالبان دکابل تر دروازو راورسېږي او د ارگ واکمنانو او چارواکو ته کډې ور بار کړي خو خدای دې وکړي چې یو ځل بیا د اریانا څلورلاری دهېواد دخرڅونکیو او دهېوادوالو دقاتلینو قتل گاه شي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close