کډوالو چارو وزارت: پاکستان کې افغانانو ته د تابعيت ورکولو هرکلی کړی

(کابل ټکی کام، ۱۳۹۷، وږی ۲۷)

د افغانستان د کډوالو او راستنېدو چارو وزير سيد حسين عالمي بلخي د پاکستان د هغه پريکړې هرکلی کړی چې په وينا يې په دغه هېواد کې افغانانو ته د تابعيت تذکيرې ورکوي.

بلخي، دا د پاکستان يو ښه اقدام دی چې په عملي کولو سره به يې په هغه هېواد کې د افغانانو ډیری ستونزې حل شي.

د بلخي په وينا، دا مهال افغانان بانکي حسابونه نه لري، د سيم کارتونو په رانيولو کې او د اوسېدنې په ځايونو کې ستونزې لري چې د تابعيت په ورکولو سره به دا او ګڼې نورې ستونزې حل شي.

عالمي وايي، تر اوسه په دې اړه کره معلومات نه لري چې افغانانو ته د پاکستاني تابعيت ورکولو لړۍ به کله پيل شي خو تيره ورځ د پاکستان د کورنو چارو وزارت د سرچينو له قوله راپورونه ورکول شول چې افغانانو ته د تابعيت ورکولو لپاره عملي ګامونه اخيستل شوي او څلورو واړو ايالتونو ته لارښوونه شوې چې د ناثبت افغانانو او نورو بهرنيانو په اړه له مرکزي حکومت سره معلومات شريک کړي.

د پاکستان لومړي وزير عمران خان وړمه ورځ په کراچۍ کې يوې غونډې ته د وينا پر مهال وويل، چې په پلان کې ده په پاکستان کې ميشت هغه افغان او بنګالي کډوالو ته د تابعيت تذکيرې او پاسپورټونه ورکول شي چې په دغه هېواد کې پيدا شوي وي او دغلته يې څلوېښت کاله تير کړي وي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close