۱۷ کلنې جګړې طالبان تر هر چا ماهر پوځيان کړل

تميم توفيق

زمونږ په ګران هيواد دامريکايانو يرغل او ۱۷ کاله اوږدې جګړې دا خبره لا ښه ثابته کړه چې د جګړې په ډګر کې هغه څوک ښه ځلېدلي او کامياب دي، چې له مروجو پوځي زده کړو پرته د تهاجم او دفاع تجربه ورته حاصله ده.
طالبان د دې تجربې ښه مثال دی. ما چې زمونږ د سيمې طالبان ليدلي، يو يې هم له پوځي اکاډمي او حربي پوهنتون څخه نه دی فارغ شوی، د دوی زياته برخه هغه تنکي ځوانان دي چې ۱۷ کاله وړاندې يې ايله د کلاشنکوف نوم زده کړی و او څو کاله مخکې ايله په دې پوه شول چې وسله يې د دين او وطن د دفاع يوه وسيله ده چې بايد زده او استعمال شي.
په دومره لنډه موده کې د طالب په څير د جګړه ييز مهارت حصول د غربي نړۍ، د هغوی د ايتلافيانو او ملګرو جنرالانو ته د حيرانۍ وړ دی، چې بايد وي هم؛ ځکه خو يې له منلو هم انکار کوي.
خو واقعيت او سبب يې دا دی چې د طالب په نوم افغان مبارزين يو درد لري، يو احساس لري او بلاخره دين، ملت او ملي ارزښتونو ته ژمن انسان دی، همدا وجه ده چې په ټوله سپېڅلې جذبه او جوش او خروش د خپل دښمن (امريکا او د هغوی ياران) په وړاندې په پوره اخلاص راپورته کيږي او په بې نظيره شوق جګړه ييز مهارتونه زده کوي او استعمالوي، چې نن يې نتيجه د ۴۹ په هر لحاظ پرمختلليو يرغلګرو هيوادونو د ماتې او شرمونکي شکست په شکل کې وينو.
دا خبره د ټايمز امريکايي مجلې د هغه خبر له لوستلو سره راياده شوه چې وايي ايران طالبانو ته پرمختللې جنګي زده کړې ورکوي او بيا يې افغانستان ته د ايتلافي او افغان ځواکونو مقابلې ته رااستوي.
زما په باور دغه د طالبانو په وړاندې د لويديځوالو د تبليغاتي توفان له څپو څخه يوه ده، چې موږ يې له ۱۷ کلونو راهيسې اورو خو څرنګوالی مو يې تر اوسه نه دی ليدلی.
امريکا او ملګري يې چې د يرغل په لومړيو کې له غرور او فرعونيته ډک و، په طالب يې يوازې د القاعده د ملاتړ تور پورې کړ، چې د دې کمزوري ادعا په بنا يې زمونږ په هيواد ناروا يرغل راووړ او ويل يې چې هر څوک د طالب خوا نيسي، له خاورو سره به يې خاورې کړي، مګر نن چې يې طالبي ځواک فرعوني زور اوبه کړ؛ نو کله يې د روس په ملاتړ، کله يې د پاکستان، ايران او يا نورو هيوادونو په ملګرتيا تورنوي.
د امريکايي لاسپوڅو رسنيو په خلاف زمونږ مشاهدات ښيي چې طالب جنګيالي زمونږ په خړو پټو، ډاګونو او د سره شوروي په بې رحمانه بمباريو ورانو شويو کلاګانو کې ابتدائي پوځي زده کړې کوي او لوړ مهارت بيا د مخامخ جګړې په ډګر کې حاصلوي. موږ کليوال هر ورځ او شپه وينو چې د کابل ادارې د پوځي اکادميو بالعکس له طالب مبارزينو سره نه روسي مشاورين شته، نه امريکايي، نه پاکستاني، نه ايراني او نه د نورو ۴۹ يرغلګرو هيوادونو تجربه شوي جنرالان.
بلکې طالب يو خړ پړ کليوال ځوان دی، چې يوازې او يوازې په خپل هيواد د کافرو او بې رحمه لويديځوالو د نظامي حضور سرسخت مخالف، د هيواد او هيوادوالو د استقلال او اسلامي نظام د اعادې بې کچې ارمانجن او د ارضي تماميت او ملي ارزښتونو د خونديتابه داوطلب سپيڅلی مدافع دی.
زمونږ هيواد کې په دغسې کچه بې شعوره خلک هم شته چې له نظامي علاوه په مالي برخه کې هم په طالبانو د پرديو هيوادونو د همکارۍ بې بنسټه او له واقعيته لرې تور لګوي، چې موږ يې بشپړ مخالف واقعيت وينو، هغه دا چې په ۱۷ کلونو کې مو تر غوږ نه شول چې د طالبانو افرادو د تنخوا له ځنډ يا نه شتون څخه شکايت کړی، مګر په دولتي ځواکونو هره ورځ خبريږو چې تنخوا ورته نه ده رسېدلې، حال دا چې ۴۹ هيوادونه يې هر اړخيزه مرسته او تمويل کوي.
موږ مشاهده کوو چې د طالبانو په ليکو کې په جګړه بوخت افراد يو هم معاش نه لري، حتی که ووايو چې يو يې هم پوځي اکادمي او حربي زده کړې نه پېژني، دروغجن به نه شو، اما بالمقابل دولتي ځواکونه له هرڅه برخمن دي، مګر بيا هم بری د ګوتو په شمير د يرغل خلاف مبارزينو په برخه دی، له دې مشاهداتو په اسانه پوهيدلی شو چې د دې خوځښت تر شا مرئي نه بلکې يو نامرئي اعلی قوت شتون لري.
نو لنډه دا چې که ايران، پاکستان، روسيه او….. کې په حاصلو شويو پوځي زده کړو او يا د ۴۹ ماډرن ټيکنالوژي لرونکو هيوادونو په ملاتړ بريا تر لاسه کيدای، اشرف غني به اوس د اسيا پر لويه وجه راج چلاوه، خو هيڅکله داسې نه ده.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close