(کابل ټکی کام، ۱۳۹۸، وږی ۳)
د زابل ولايت د مرکز قلات په مربوطاتو کې پر پوځي قرارګاه د طالبانو برید کې ګڼ شمير عسکر وژل شوي او یو يې طالبانو ژوندی نيولی دی.
دغه بريد تيره شپه د کابل- کندهار پر لویه لاره د سپينې غبرګې سيمه پر قرارګاه ترسره شوی دی.
طالبانو د يادې پوځي قرارګاه د نيولي ادعا کړې او ویاند يې قاري يوسف احمدي په خپله رسمي ټويټر پاڼه ليکي، د جګړې پر مهال پنځلس عسکر وژل شوي چې جسدونه يې لا هم د جګړې په ځای کې پاتې دي او یو تن يې طالبانو ژوندی نيولی دی.
د احمدي په وينا، د جګړې په ترڅ کې پنځه ټانګونه، دوه رينجر موټر سوځول شوي او په زياته اندازه وسلې او مهمات د طالبانو لاسته ورغلي دي.
په مرکز قلات کې امنيتي سرچينې د غبرګې پر قرارګاه د طالبانو برید او پکې د عسکرو وژل کيدل تاييدوي خو تر اوسه ولايتي مسؤولينو په رسمي ډول په دې تړاو څه نه دي ويلي.