کابل ټکی کام (سه شنبه، ۲۰ غبرګولی، ۱۴۰۴ل)
د راپورونو له مخې ، د امریکا د ولسمشر ډونالډ ټرمپ د کډوالۍ ضد پالیسیو پر وړاندې په لسګونو ښارونو کې پراخ احتجاجونه روان دي، چې له لاس اینجلس څخه نیولې تر فلوریدا پورې غځېدلي دي.
دا مظاهرې له هغه وروسته پیل شوې چې د کډوالۍ او ګمرکاتو فدرالي ادارې (ICE) د جون له ۶مې راهیسې په لاس اینجلس کې پراخې چاپې پیل کړې، څو غیرقانوني کډوال ونیسي خو د دغو عملیاتو پر ضد د خلکو لاریونونه په تاوتریخوالي واوښتل او د مظاهرهچیانو او پولیسو ترمنځ نښتې رامنځته شوې، چې په پایله کې یې لسګونه کسان نیول شوي او ګڼ شمېر پولیس او مظاهرهچیان ټپیان شوي دي.
د مظاهرو په پيل کې د وضعیت د کنټرول لپاره، د امریکا ولسمشر ټرمپ د کالیفورنیا ملي ګارډ فدرالي کړ او ۳۰۰ سرتېري یې د لاس اینجلس واټونو ته ولېږل، خو دغه اقدام بسنه ونه کړه او د امریکا دفاع وزارت تازه اعلان وکړ چې د جون په ۱۰مه به ۷۰۰ تنه د سمندري ځواکونو سرتېري د AH-1W سوپر کبرا جنګي چورلکو تر ملاتړ لاندې په لاس اینجلس کې ځای پر ځای شي.
دا نظامي مداخله د کالیفورنیا والي ګاوین نیوسم لهخوا سخته وغندل شوه او ویې ویل چې دا د “ډیموکراسۍ ضد” او “دیکتاتورانه” اقدام دی.
په ورته وخت کې، د وايمو (Waymo) شرکت یو شمېر چلونکي موټرونه د مظاه چيانو له لوري سوځول شوي، چې مظاهرې د پراخيدو په حال کې دي.
امنیتي ځواکونه د مظاهرهچیانو د تیتولو لپاره له اوښکې بهوونکي ګاز او ربړي مرمیو کار اخلي، چې له امله یې د تاوتریخوالي کچه لوړه شوې او د نړیوالو رسنیو پام یې ځان ته اړولی دی.
د ټولنیزو رسنیو کاروونکو دغه وضعیت د امريکا د پخوانۍ ولسي جرګې مشرې نانسي پیلوسي له هغه بیان سره پرتله کړی، چې رنګین انقلابونه یې “ښکلی منظر” بللي وو. اوس دا اصطلاح په طنزیه ډول د امریکا د کورني بحران لپاره کارول کېږي.
