کابل ټکی کام (پنجشبه، ۱۶ زمری، ۱۴۰۴ل)
اسلامي امارت د بشري حقونو د څار سازمان وروستی راپور رد کړی، چې پکې د ښځو د حقونو د نقض او د نجونو د زدهکړو د محدوديتونو يادونه شوې ده.
د اسلامي امارت د وياند مرستيال حمدالله فطرت ویلي، د هېواد د ټولو وګړو حقونه خوندي دي او د ښځو زدهکړې يوه داخلي موضوع ده.
فطرت زیاتوي چې د اسلامي ټولنې د ارزښتونو پر بنسټ، حقونه د شريعت په چوکاټ کې تعریفېږي او د هغوی تأمين د اسلامي حکومت شرعي مسؤلیت دی.
هغه وايي: «په افغانستان کې د هېچا حق نه دی نقض شوی او موږ د حقونو تأمين خپله ديني دنده بولو.»
په عين حال کې د بشري حقونو د څار سازمان ټینګار کړی چې ملګرو ملتونو ته اړينه ده يو نوی پلټنیز ميکانيزم رامنځته کړي.
