کابل ټکی کام (شنبه، ۱ لیندۍ، ۱۳۹۹ل)
قطر کې د بین الافغاني مذاکراتو له جریان یوې باخبره سرچینې خبر ورکړی چې دواړو ټیمونو د طالبانو او امریکا تر منځ لاسلیک شوی تړون د اساس په توګه منلی دی.
سرچینه زیاتوي، د مذاکراتي ټیمونو د تماس ډلو تر منځ تر اوږده ځنډ وروسته، په څلور اصولو توافق شوی چې څلورم او تر ټولو اختلافي اصل یې، د دوحې تړون دی چې د اساس په توګه منل شوی.
ویل کیږي چې له دغه مهم توافق وروسته دوحه کې دواړه مذاکراتي ټیمونه د مذاکراتو پر اجنډا د بحث لپاره په چمتووالي بوخت دي.
سرچینې همدا راز ویلي چې ډاکټر غني د سیاسي احزابو د مشترک پلاوي مشر معصوم ستانکزی او عبدالسلام رحیمي کابل ته را غوښتي او ښایي ډېر ژر یې بیرته دوحې ته ولېږي.
بل لور ته د فرانس پرس خبري اژانس خبر ورکړی چې ټاکل شوې د امریکا د بهرنیو چارو وزیر مایک پمپيو منځني ختيځ ته د خپل سفر په ترڅ کې د طالبانو مذاکراتي پلاوي سره وګوري او په مهمو موضوعاتو ورسره خبرې وکړي.
