کابل ټکی کام (دوشنبه، ۱۰ لیندۍ، ۱۳۹۹ل)
افغان ماشوم سره د اسټرالیایي سرتیري ګواښونکي انځور د چین او اسټرالیا تر منځ ناندرۍ راپورته کړي، او دواړو هیوادونو یو بل ته پیغورونه ورکړي دي.
د چین بهرنیو چارو وزارت ویاند پرخپله ټویټرپاڼه د یوه افغان ماشوم هغه انځور چې استرالیایي سرتیری پکې په وینو لړلې چاره یو افغان ماشوم ګواښي خپور کړی دی.
هغه له دغه انځور سره په خپور کړي ټوېټ کې لیکلي،(له افغان ماشوم او ملکي وګړو سره دغه راز چلند ټکان ورکونکی دی) چې باید وغندل شي.
د دغه انځور پر خپرېدو د اسټرالیا صدراعظم توند غبرګون ښودلی، دغه انځور یې زړه بوږنوونکی او له سپکاوي ډک بللی دی.
نوموړي ویلي، چین باید د دغه انځور د خپرېدو له امله د شرم احساس وکړي، بښنه وغواړي او تر هر څه ژر دغه انځور بیرته لرې کړي.
خو د چین بهرنیو چارو وزارت ویاند د اسټرالیا د صدراعظم دغه وړاندیز رد کړی او وایي اسټرالیا باید د خپل دې کار او ظلم له امله د شرم احساس وکړي.
افغانستان کې د اسټرلیایي ځواکونو د جنګي جنایاتو موضوع له هغه وروسته په تود بحث واوښته چې یو شمېر نړیوالو بنسټونو له نړیوالې جنایي محکمې وغوښتل تر څو دغه قضیه وڅیړي او مجرمینو ته سزا ورکړي.
