کابل ټکی کام (دوشنبه، ۱۰ لیندۍ، ۱۳۹۹ل)
د کابل حکومت دفاع وزارت تر ادعا وروسته چې تیره شپه یې د غزني ولایت د ګیرو ولسوالۍ په «علي شیرخیل» سیمه کې د حمزه وزیرستاني په نوم هغه طالب قومندان وژلی چې د نظم عامه په کنډک خونړی موټر بم برید يې پلان کړی ؤ، طالبانو ویلي، چې د حمزه وزيرستاني په نوم کوم قوماندان نه لري.
طالب ویاند ذبیح الله مجاهد په خپله ټویټر پاڼه د یو پیغام په خپرولو سره ویلي، چې په غزني ولایت کې د حمزه وزیرستاني په نوم د دوی په لیکو کې کوم جنګیالی نه شته او کوم انځور چې د کابل حکومت دفاع وزارت خپور کړی، د نوموړي په خبره هغه کرامت خان نومیږي چې د پکتیکا ولایت په ګیان ولسوالۍ کې فعالیت کوي.
مجاهد زیاته کړې: «د غزني ګیرو ولسوالۍ په علي شیرخیلو سیمه کې د ۸ تنو مجاهدینو د شهادت پروپاګند حقیقت نلري.
زموږ اړوند هیڅ مجاهد هلته ندی شهید شوی.
دښمن چې د حمزه وزیریستاني په نوم عکس خپور کړی هم دروغ ده، د عکس خاوند کرامت خان نومیږي د پکتیکا په ګیان کې جهاد کوي، ژوندی، جوړ او روغ دی.»
د ویلو ده چې تېره ورځ د غزني ولایت مرکز ته څېرمه د نظم عامه پولیسو په مرکز د طالبانو لخوا موټر بم برید ترسره شو، چې په پایله کې یې دولتي عسکرو ته درنه مرګ ژوبله واوښته.
