کابل ټکی کام (جمعه، ۱۴ لیندۍ، ۱۳۹۹ل)
د راپورونو له مخې د سوریې په شمال کې د ترکي ځواکونو په هوایي برید کې ګڼ شمېر کردي وسلوالو ته مرګ ژوبله اوښتې.
د ترکیې دفاع وزارت د یوې خبر پاڼې په خپرولو سره ادعا کړې چې د سوریې په شمال کې یې د کرد وسلوالو له لوري د یو ترکي سرتیري تر وژلو وروسته د وسلوالو په مرکزونو هوایي بریدونه کړي چې په پایله کې ۱۷ وسلوال وژل شوي او ګڼ شمېر نور ټپيان دي.
که څه هم تر دې دمه د کردي وسلوالو د ترکي ځواکونو په هوایي برید کې خپلو جنګیالیو ته د اوښتې مرګ ژوبلې په اړه څه نه دي ويلي، خو ترکیې د تېر کال راهیسي په سوریه کې د کرد وسلوالو پر وړاندې ځپونکي عملیات پیل کړي او کردي وسله والو ته ډېر زيانونه اړولي دي.
