غورځنګ
په ټولو نړيوالو ولسونو کې رسنۍ د خلکو د غږ انعکاس کوونکې، د مظلومانو د غږ پورته کوونکې او د ظالمانو په خلاف مظلومانو ته د مرستو راجلبوونکې بلل کيږي. مګر په اسلامي ټولنو کې رسنۍ د مظلومانو د غږ اوچتولو يا انعکاس کولو هغه هنداره ده چې په خورا مخفي، پټ او محتاطانه ډول د مظلومانو غږ له تصوير سره هممهاله غږ اوچتوي، او خلک د مظلومانو مرستې ته رابولي، خو دغه غږ کله کله دومره انعکاس ومومي چې د ظالمانو توجه ځانته راجلب کړي او ظالمان بيا د دغو اوازونو د انعکاس کوونکو رسنيو د ورکولو او غلي کولو هڅې کوي، دغه هڅې په مختلفو ډولو تر سره کوي چې کله کله د ترور بڼه لري، کله بيا هدفي وژنو بڼه لري او کله کله په نورو ډولونو باندې وي.
خو تر ټولو ځوروونکې يې دا چې د دغو وژو او ترورونو پړه هم اداره يا پر نورو (خپلو دښمنانو) وراړوي او يا هم خبره همداسې غلې پرېږدي.
په رسنيزو هندارو کې دغږ منعکسوونکي او پورته کوونکي وګړي هغه بې پرې ځوانان، سياسي شنونکي او د ښه نظر خاوندان، اسلام پالونکي او هېوادپالونکي اشخاص وي چې په حقيقت کې هر څه د خپل مظلوم ولس، مظلوم هېواد، د کادرونو د ضايع کېدو د مخنيوي او نورو ګټورو موخو لپاره په رسنيو کې د ولس غږ اوچتوي او هڅه کوي چې ولس ته ښېرازي، سوکالي او ازادي واخلي او يا هم د خپل ولس په هيلو، غوښتنو، مظالمو او ناخوالو نور ولسونه خبر کړي…
دا چې زموږ افغان ولس هم له اسلامي ولسونو څخه دی نو ځينې رسنۍ، پکې د سياسي اشخاصو، شنونکو، د نظر خاوندانو او بې پرې ځوانانو له لوري د پورتنيو موخو لپاره کارول کيږي. چې دغه چاره پر کابل ادارې بده لګيږي د دوی شخصي ګټو ته زيان رسوي، د دوی په فساد، عياش فطرت، رشوت او نورو بد اعمالو باندې نړۍ خبروي…
چې دا بيا نړيواله رسوايي پېښوي..
نو له دې امله د دغو خلکو د له منځه وړلو لپاره کابل حکومت امرالله صالح او د امنیت رياست مقرر کړی تر څو دغه پورته کوونکی غږ غلی کړي او دوی چې څه کوي نو دهغې په خلاف بايد څوک غږ پورته نکړي…
له دې امله ده چې د نظر خاوندان، سياسي شنونکي، بې پرې ليکوالان او نور په نښه کيږي او له منځه وړل کيږي چې بيا يې پړه يا پر طالبانو اچول کيږي او يا هم پرې غلي پاتې کيږي.
نو په حقيقت دا بيان د ازادۍ پر اصولو او قوانينو بريدونه دي او له دې سره نه يوازې دغه ظالمه اداره په نړيواله کچه منفوره کيږي بلکې تر دې ادارې د دې ادارې اصلي طراحان بدناميږي چې امریکايان دي او د دوی په پيسو او نظامي بوديجې دغه اداره منځته راغلې…
دلته هغه د کاذبې ډيموکراسۍ کاذب دعوه داران، د بيان د ازادۍ کاذب شعاريان او نور تش نامي بشر دوستان تر پوښتنې لاندې نيول کيږي او په نړيواله کچه منفوريږي.
ځکه چې دغه اداره شل کاله مخکې د بن په کنفرانس کې د بيان دازادۍ، د ښځو د کاذبو حقوقو، د بشر دوستۍ د قوانينو او اصولو د مراعتوولو او نورو ظاهرو خوږ شعارونو تر عناوينو لاندې منځته راغلې او د دې تر شا د امريکا مستقيم لاس ؤ، د دې پر ضد يې په هېواد سوچه اسلامي شرعي نظام په دې بهانه له منځه وړی چې ګواکې موږ به يې بديل؟ درته راولو. خو همدا اداره افغان ښځې په بمباردونو، شپنيو چاپو، امریکایانو ته د کورديناتو ورکولو او نورو بريونو کې وژني، نظر خاوندان، سياسي شنونکي او نور په مرموزو بريدونو له منځه وړي، ان د دوی په زياترو بريدونو کې کوچني ماشومان په نښه کيږي.. نو همدا لامل دی چې هر د دغې ادارې د بدو اعمالو پړه تر ټولو زياته پر امریکا او ناټو اچول کیږي….
