کابل ټکی کام (سه شنبه، ۲۳ مرغومی، ۱۳۹۹ل)
د افغانستان ملي لوبډلې تکړه لوبغاړي راشدخان د اډیلایډ سټرایکرز ټيم په ګټه په سږني بیګ بش شل اوریزو لوبو کې لس لوبې وکړې او شپاړس ویکټې یې واخیستي.
راشد خان په سږني لیګ کې وروستۍ لوبه د ملبورن سټارز په وړاندې وکړه او دوه لوبغاړي یې وسوځول.
په دې لوبو کې د راشد خان ترڅنګ محمد نبي، مجیب الرحمن او نوراحمد هم ګډون کړی و.
ټاکل شوې، چې یاد درې افغان لوبغاړي په متحده عرب اماراتو کې د افغانستان د ملي ټیم له تمرینونو سره یوځای شي څو له ایرلند سره یو ورځنیو لوبو ته چمتو شي.
د افغانستان او ایرلند دری یو ورځنۍ لوبې د ابوظبۍ په شیخ زاید سټډیوم کې د جنورۍ له ۲۱ پیلېږي.
