تېره ورځ چې د طالبانو د قطر د سياسي دفتر وياند محمد نعيم وردګ ويلي وو پلاوي يې له امریکا او خليلزاد سره د ځينو موضوعاتو په تړاو لیدنه کړې او دغه موضوعات يې د خپلو مشرانو نومونه له تور لسته وېستل او همدارنګه پاتې طالب بنديان ښودلي دي.
خو په عين وخت کې بيا په امريکا بل رنګه حالات روان دي او په يوه داسې امریکا کې چې د انسان فکر ته نه لوېده چې هلته دې هم توپيري چلند، طبقاتي سيستم، د سپين او تور توپير او د سياست له امله د جګړو ممکنېدل، رامنځته شي، ځکه چې له دې وړاندې امریکا په نړيواله سطحه يو ځواک او د بشري حقونو مدافع بلل کېده.
خو څو مياشتې وړاندې چې جوبايډن د ټرمپ په پرتله په ډيموکراټيکو انتخاباتو کې زياتې رائيې يووړې او کامياب شو، نو ټرمپ او پلويانو يې په مظاهرو لاس پورې کړی او دغه مظاهرې يې د امریکا په زياترو ايالتونو کې په تاوتريخوالي اوښتي چې د ټرمپ د پلويانو او امريکايي پوځ تر منځ يې زياتې نښتې رامنځته کړي.
چې په سلسله کې يې څو ورځې وړاندې د ټرمپ قهرېدلي پلويان پر کانګرېس ورواوښتل او هلته يې اخ وډب رامنځته کړ چې پکې لسګونه کسان وژل شوي او ټپيان دي.
دا چې په نږدې ورځو کې به جوبايډن عملًا د امریکا سیاسي چارې په لاس کې واخلي، ډېری امريکايي جنرالانو داسې اټکل کړی او وړاندوينه يې کړې چې امریکا د شديدو داخلي جګړو لوري ته روانه ده چې دا به دامریکا په بد عاقبت پای مومي.
خو بل لور ته امريکا ته کېدای شي د ټرمپ د ځينو اقداماتو ګټې اوس ورمعلومې شي.
له دې وړاندې ويل کېدل چې جوبايډن کېدای شي د دوحې تړون نقض کړي او ځينې سرتېري په افغانستا کې پرېږدي، که څه هم جوبايډن لا تر اوسه د افغانستان په باب يا د دوحې تړون په باب کومه وينا نه ده کړې خو پلويانو يې تړون ته د ژمنتيا خبره کړې. خو بيا هم ځينې نړيوالې رسنۍ او هېوادونه د جوبايډن ګونګې پاليسۍ په اندېښنه کې اچولي او وايي چې جوبايډن د بارک اوباما په اداره کې پاتې شوی نو له دې امله ښايي جګړه خوښه کړي.
په هر صورت هغه په بايډن پورې اړه لري چې امريکا د تباهۍ لور ته بيايي او که د ابادۍ لور ته!
که چېرته د امریکا په دې حساسو شېبو کې چې ګومان کيږي خپلمنځي جګړې به پکې پيل شي؛ د دوحې تړون نه وای لاسليک شوی او جګړې هم زور اخيستی وای، نو په افغانستان کې به د امريکايي پوځيانو برخليک څه ؤ؟
يعنې بيا به د انګرېزانو او وزير محمد اکبر خان د تاريخ تړون تکرار شوی وای، چې امريکا به نور دافغانستان بين الافغاني مذاکراتو او نورو هيڅ ډول موضوعاتو ته نه وای کتلي او خپل پوځونه به يې په بې له اسلحې او مهماتو وېستلي وای.
خو دا چې د دوحې تړون لاسليک شوی او لا هم د امریکا د وتلو د وخت پای ته رسېدو ته څو مياشتې شته، نو طالبان تړون ته پوره ژمن دي او هيڅ ډول بريد په امريکايانو نه کوي نو له دې امله ده چې ښايي د امريکا له سره د افغان جګړې بوج کم شوی وي، اوس به يوازې خپل داخلي امنيت ته متوجه وي.
چې دا په حقيقت کې امريکا ته د دوحې تړون لويه ګټه ده چې په نږدې وخت کې به ورته څرګنده شي…
