کابل ټکی کام (چهارشنبه، ۱ سلواغه، ۱۳۹۹ل)
د ایران ولسمشر حسن روحاني د امریکا تېر ولسمشر«ډونلډټرمپ» ناپوه، او نوی ولسمشر جوبایډن له پراخې سیاسي تجربې برخمن بللی دی.
روحاني همدا راز زیاته کړې، که چېرته امریکا تړون ته راوګرځي دوی هم خپلو تعهداتو ته ژمن پاتې کېږي او بیاځل ورسره اړیکې رغوي.
نوموړي د خپلو خبرو پر دوام د ټرمپ دوره نه یوازې د امریکا بلکې د سیمې او ټولې نړۍ لپاره توره دوره یاده کړې او هغه یې متعصب شخص بللی دی.
روحاني په خپل هیواد کې د تېرو ټولو ستونزو مسئولیت په امریکا ور اچولی او ټینګار یې کړی چې بایډن باید د ټرمپ تېروتنې اصلاح او بیا خپلو روابطو کې مثبت بدلونونه راولي.
د امریکا نوي ولسمشر جوبایډن د خپلې لوړې مراسمو کې تر ګډون مخکې نن د کرونا وبا له امله د مړه شویو کسانو روح ته درناوی کړی او د یادې وبا پراختیا مخنیوي لپاره یې د بېړنيو ګامونه پر اخیستلو ټینګار کړی دی.
