دوهمه برخه: ديني حالت
م. بلال
په دې تېره برخه کې مو دا خبره کړې وه، چې په شپږمه ميلادي پيړۍ کې نړۍ تورو تيارو په خپله ويرونکې غيږه کې نيولې وه او انسان د خپل پيدايښت له مقصد څخه ډېر ليرې تللی و، هغه مهال نړيوالو ددين، سياست، اقتصاد، اخلاقو او او اجتماعيت په برخو کې تر ټولو لويدلي او بد حالت کې ژوند کاوه، په دې برخه کې هڅه کوو، چې د هغه مهال ديني حالت د لوستونکو مخې ته کيږدو.
لومړی: يهوديت:
د نړۍ هغه ستر مذهبونه، چې په خپل وخت کې د توحيد او خدايي لارښوونو علمبردران وو، اوس يې خپله اصلي بڼه له لاسه ورکړې وه او په ګاونډې کې اوسيدونکو بت پرستانو څخه په لويه پيمانه اغيزمن شوي وو. ددغو دينونو او مذهبونو له ډلې يهوديت هم و، چې د يو بې روحه کالبوت په څېر يوازې د يوه ميراثي او رواجي دين بڼه يې درلوده، اوس يې نړيوالو ته د توحيد، غوره اخلاقو او په ټوله کې د پرمختګ هيڅ پيغام نه درلود.
که څه هم يهودانو دغه مهال هم ځانونه د موسی عليه السلام د رواړي دين پيروان ګڼل؛ خو په حقيقت کې يې د توحيد هغه نګه عقيده او خدايي لارښوونو ته شا کړې وه، چې ابراهيم، اسحاق او يعقوب عليهم السلام يې وصيت کړی و او پرځای يې له نژدې قامونو او ملتونو څخه د بت پرستۍ او شرک په څېر ناوړه عقيدې اخېستې وې.
دا خبره په خپله انصاف لرونکي يهودي ليکوالان او تاريخپوهان هم مني او ليکي:« د بتانو او نورو شيانو د عبادت له امله يهودانو ته د خپلو پيغمبرانو غوسه ددې خبرې څرګند دليل دی، چې د بتانو د عبادت مينه د دوی زړونو ته لاره موندلې وه او دغه مينه يې له زړونو ترهغه وخته هم نه وه وتلې چې دوی (بابل) ته له شړلو وروسته بېرته خپل وطن ته ستنېدل، دوی اوس هم په ناوړه دوديزو عملونو اخته وو او د شرک عقيده يې لرله»
(Jewish Encyclopedia VOL_ XII, p.568-69) د سيد ابو الحسن علي الندوي رحمه الله د (د السیرة النبوية) کتاب په حواله.
لنډه داچې په شپږمه او اوومه ميلادي پيړۍ کې يهودانو په ټوليز ډول د خپل اصلي دين څخه مخ ګرځولی و او د ځينې شرکي عقيدو ترڅنګ يې معاملات هم فاسد شوي وو، سود/ربا پکې په پريمانه کچه موجوده وه، دغه راز په ناروا او باطله د خلکو مالونه خوړل، د الله تعالی له رښتينې لارې د خلکو منع کول، په خدايي احکامو کې رد و بدل(تحريف) او داسې نور ناوړه عملونه يې ترسره کول، چې هغه مهال د يهودانو د ديني حالت څرګندونه کوي.
نور بيا…..
سرچينې:
د علامه ابوالحسن علي الندوي رحمه الله دوه کتابونه:
۱ – ماذاخسرالعالم بانحطاط المسلمين
۲ ـ السیرة النبوية.
دغه راز د محترم استاد مفتي حبيب الله قاسمي صاحب په لاس ژباړل شوي سيرت څخه استفاده شوې.
