کابل ټکی کام (پنجشنبه، ۲ سلواغه، ۱۳۹۹ل)
د وینزویلا ولسمشر “نیکولاس مادورو” وایي، چې هېواد یې د ډونالډ ټرمپ په تګ تر ډیره خوندي شوی او د امنیت احساس کوي.
مادورو پر خپله ټویټرپاڼه د یو پیغام په خپرولو سره ټرمپ مغرور، احساساتي او لیونی بللی او په خبره یې هره ګړۍ یې امکان درلود چې امریکا په یوه تباه کونکې جګړې کې ښکیل کړي.
د ولسمشر مادورو په خبره داچې ټرمپ امریکایانو رد کړ، د وینزویلا لپاره ښکاره بری دی، ټرمپ لاړ او نړۍ یې له شره د تل لپاره خوندي شوه.
د وینزویلا ولسمشر د خپلو خبرو پردوام اضافه کړې چې ټولې نړۍ سره د درناوي په چوکاټ کې د دوه اړخیزو اړیکو غوښتونکي دي او د بایډن اداره که د دوښمنۍ پالیسي ته د پای ټکی کیږدي مونږ هم د اړیکو په عادي کولو فکر کولی شو.
