م. احمد طلحه
داسې مهال چې ټاکل شوې د دوحې تړون له مخې شاوخوا څلور مياشتې وروسته بايد ټول بهرني عسکر له افغان څخه ووځي، د افغانستان شل کلن اشغال پای ته ورسيږي او افغانان پرېښودل شي، چې په خپله خوښه يو خپلواک او ملي او ديني ارزښتونو ته ژمن نظام جوړ کړي، په امريکا کې يوه نوې اداره د چارو واګې په لاس کې اخلي، چې ورسره د دوحې تړون د برخليک په اړه يو ډول اندېښنې هم راپورته شوي دي.
د چارو ډېری شنونکي په دې باور دي، چې که څه هم د امريکا نوی ولسمشر جوبايډن د پخواني ولسمشر ټرمپ له ډېرو پاليسيو سره مخالف دی او همدا لامل دی، چې په لومړۍ کاري ورځ يې د ټرمپ ډېر فرمانونه او اقدامات لغوه کړل؛ خو د افغانستان په مسئله کې تر ډېره بريده دی هم د امريکايي ځواکونو د ايستلو ملاتړی دی او داسې نه ښکاري، چې د ډونالډټرمپ د واکمنۍ پرمهال د ملګرو ملتونو او لسګونو سازمانو په حضور کې طالبانو سره شوي تړون څخه به ووځي. او ددې ډېر لاملونه دي، چې ځېنې يې په لاندې ډول د يادونې وړ دي:
لومړی: د امريکا نوي ولسمشر جوبايډن او د هغه ټيم که څه هم تر اوسه د افغانستان په هکله خپله پاليسي نه ده څرګنده کړې، خو تر دې وړاندې يې له افغانستان څخه د امريکايي ځواکونو پر ايستلو او دغې اوږدې جګړې پای ته رسولو باندې ټينګار کړی.
دوهم: طالبانو په شخصي ډول له ډونالډ ټرمپ سره ددې تړون او فغانستان څخه د ټولو بهرنيو ځواکونو د ايستلو په باب خبرې نه وې کړې، بلکې په دې خبرو کې د امريکا استخبارات، قانون جوړونکې ادارې او د پردې تر شا تر ټولو ډېر واکمن خلک هم برخه وال وو، چې د ټرمپ له تګ وروسته هم هغوی په واک کې دي.
دريم: طالبانو، چې د امريکايي اشغال پر وړاندې يې اوږده مبارزه وکړه او په نظامي برخه کې يې د نړيوالو له اټکلونو پورته لاسته راوړنې لري، هيڅکله له خپلې مبارزې څخه د ستړيا احساس نه دی کړی او نه يې امريکا سره د مجبوريت له مخې تړون کړی دی، بلکې امريکا چې په نظامي برخه کې له سترې ناکامۍ سره مخ ده، د دې تړون له مخې غواړي چې افغانستان کې خپله جګړه پای ته ورسوي او خپل پاتې حيثيت وساتي.
څلورم: تقريباً ټول امريکايي ولس د افغانستان د جګړې پای ته سول غواړي او غوښتنه لري چې امريکايي عسکر کور ته ستانه شي؛ نو د امريکا نوې اداره نشي کولی چې د ټول ولس غوښتنه له پامه وغورځوي.
خو بيا هم که د ټولو اټکلونو خلاف د بايډن اداره طالبانو سره شوي تړون څخه ووځي، په هکله يې د طالبانو پاليسي او دريځ خورا واضح دی، چې د هيواد تر بشپړې ازادۍ پورې به خپلې مبارزې ته ادامه ورکړي او په دې لاره کې يې هيڅوک مخه نشي نيولی.
