له څه وخت راهيسې د جوبايډن ادارې د دوحې تړون په باب مختلفې اوازې خپرې کړې، کله وايي چې له سره يې بيا ارزونه کوو او کله بیا وايي چې د سولې او دوحې تړون ته پوره ژمن يو، له دې سره د غني، صالح، محب او نورو سوله ضدو اشخاصو هغه کاذبه خوشباوري بيا زياته شوې ښکاري چې د امريکايي پوځيانو پاتې کېدو ته يې لرله.
دغه ډله چې له ډېره وخت په افغانستان، سيمه او نړۍ کې د سولې ضد څېرو په نومونو پېژندل شوې، تازه يې امريکا ته د دې لپاره چې ګوندې د دوی واک بقا ومومي؛ چاپلوسي پيل کړې او په ټويټونو او نورو شخصي اکاونټونو کې يې د بايډن د ادارې له ستاينې سره په څنګ کې د دوحې تړون په اړه د امريکا د نوې ادارې شکمنه پاليسي ستايلې او ورڅخه غوښتي يې دي چې له افغانستانه په وتو کې دې له جديت څخه کار نه اخلي بلکې دلته دې خپل پوځونه پرېږدي تر څو طالبان واک ته ونه رسيږي. د دوی په وينا که چېرې طالبان واک ته ورسېدل نود امريکا ګټو ته به خطر پېښ شي.
دغه ډله خلک د بين الافغاني مذاکراتو په درېدو هم خوښ برېښي خو په عين حال کې د مذاکراتو د درېدو پړه هم پر طالبانو وراچوي او وايي چې طالبان په مذاکراتي ناستو کې له برخې اخيستو څخه انکار کوي.
دا په داسې حال کې دي چې دغه اشخاص په وروستيو کې هم په داخلي او هم په خارجي سطحه له سترې رسوايۍ سره مخ دي، د باندنيو رسنيو په قول کابل اداره په مستبدو نظامونو کې شامله شوې او غواړي چې د زور او استبداد له لارې واک وغځوي، د دې تر څنګ سيګار، فارن پاليسي او نورو بنسټونو له امریکا غوښتي چې ياده اداره د سولې له ضد فعالیتونو څخه راوګرځوي. او پرېږدي چې افغانان له سولې څخه برخمن شي.
پرون چې پخواني امریکايي پوځي جنرال ډنفورډ د دوحې تړون اړوند د بايډن ادارې ته سپارښتلیک سپارلی، چې ګواکې له افغانستان څخه د ځواکونو په وېستلو کې بيړه مه کوئ! او په وينا يې کېدای شي حالات بيا دامريکا له کابو ووځي؛ د ډنفورډ د دغه سپارښتليک څخه د کابل ادارې ټولو لوړپړو چارواکو چې په سوله ضدو څېرو هم پېژندل کيږي؛ ملاتړ کړی. له خپلو شخصي اکاونټونو يې ليکلي چې د ډنفورډ د دغه ليک ملاتړ کوي او په وينا يې دوی اوس له طالبانو سره د جګړې کولو مورال نه لري نو پر همدې اساس بايد امريکا د ځواکونو په وېستلو کې بيړه ونه کړي.
خو طالبانو په خپل غبرګون کې چې د ډنفورډ دغه سپارښتلیک ته يې کړی، ډنفورډ په افغانستان کې يو ناکام نظامي جنرال بللی او ويلي يې دي چې د خپلې ناکامۍ له امله له دوحې تړون سره تضاد لري او غواړي چې د دوحې تړون نقض کړي.
غني او اداره يې په داسې مهال د امریکا نوې ادارې ته چاپلوسي او په افغانستان کې د پاتې کېدو زارۍ کوي چې په دې وروستيو کې په کابل او نورو ښاري سيمو کې مرموزې وژنې تر بل هر وخت ډېرې شوې دي. د نظر خاوندان، ښاري علماء، سياسيون، سوله خوښي او داسې نور د بې پرې ګوندونو غړي او مشران په نښه کيږي چې پکې د سياسيونو له انده دغه بريدونه هم د غني د لومړي مرستيال امرالله صالح او ځينو نورو سوله ضدو اشخاصو په اشارو کيږي او لاملونه يې هم د سولې په اړه د کابل له داخل څخه هغه شعارونه دي چې د دغو په نښه کېدونکو اشخاصو له لوري پورته کيږي او سوله ضد اشخاصو پکې غندل کيږي، د دوی څېرې پکې بربنډيږي او له نړيوالې رسوايۍ سره يې مخ کوي.
کابل اداره په داسې حال کې د امريکايي ځواکونو د پاتې کېدو کاذبه هيله مندي ښکاره کوي چې تېر شل کلونه امریکا په لکونو عسکرو د افغانستان جګړه ونه ګټله نو په پاتې لسو زرو عسکرو به يې څنګه وګټي؟
خو اصل دا دی چې کابل اداره د نور څه په غم کې نه ده بلکې د خپل واک د بقا غم وړې، چې د امريکايانو په پاتې کېدو کې که څه هم د ملت او ټولو خواوو زیان دی، خو د دوی لنډمهاله بقا پکې نغښتې ده.
مګر که چېرې د امريکا نوې اداره د خپلو وتلو په باب د کابل ادارې ژړاګانو، واويلاوو، چاپلوسيو او زاريو ته ګوري نو ښايي له لوی زيان او تاوان سره مخ شي، نړيوال حيثيت به يې دومره راولوېږي لکه څنګه چې د شوروي اتحاد حيثيت له ستر نوم او طاقت څخه يې کمزوزې روسيې ته راټيټ شو. خو هغه وخت به بيا له امریکا څخه وخت تېر وي او هيڅ به هم په لاس نه ورځي.
