لیکوال: فاتح افغان
د جو بايډن د ادارې له لوري د تړون د بيا ارزونې له اعلان او د امريکايې چارواکو د ګډو وډو څرګندونو وروسته داسې تحليلونه ډير شوي چې افغان ولس ته د تړون د ماتيدو متوقع زيانونه څيړي او ليکوالان د خپلو انديښنو څرګندونه کوي.
په دې کې شک نشته چې د دوحې تړون ماتيدل افغان ولس ته ډير زيان لري او خدای مکړه که مات شي جګړه به ورسره ژبغړانده او چټکه شي چې له امله به يې د ډيرو افغانانو وينې توی شي.
خو دا هم ياد ساتل پکار دي چې د تړون د ماتولو به خارجي اشغالګر هم درنه بيه پرې کوي، د امريکا له غدر څخه ډک تاريخ ته په کتو شايد طالبانو لا له وړاندې څخه داسې يوې ورځې ته پوره تياری نيولی وي، حالات دا شاهدي وايې چې افغان ولس او طالبان لاس تر زنې ندي ناست بلکه په ټولو برخو کې يې خپلې هلې ځلې چټکې کړي دي، حالاتو په کتو موږ په لنډه توګه ويلای شو چې که د دوحې تړون له منځه لاړ شي.
خارجي ځواکونه به په افغانستان کې له سختو مرګونو بريدونو سره مخامخ شي، دا ځواکونه په ټول هيواد کې د طالبانو تر مستقيم څار لاندې دي او د تړون له ماتيدو وروسته د طالبانو تر کاري ګذارونو لاندې راتلای شي.
په خارجي ځواکونو به نفوذي بريدونه بيا ځلې پيل شي، هغه چې په مخنيوي کې د غربيانو پرمختللې ټيکنالوژي پاتې راغلې او په تير کې يې يرغلګرو ځواکونو ته د سر درانه زيانونه اړولي دي. داسې معلوميږي چې طالبانو د تړون په موده کې د تخنيک او پوځي صنعت په برخه کې هم د پام وړ پرمختګ کړی چې د بې پيلوټه الوتکو کارونه يې ښکاره بيلګه ده، که دا ځل جګړه له سره تونده شي، خارجي ځواکونه به يې له لمبو څخه خوندي پاتې نشي، طالبان به وکولی شي هغوی د محفوظو کلاګانو په منځ کې په نښه او هدف وګرځوي.
له خارجي يرغلګرو او پلويانو څخه يې ورځ په ورځ د افغانانو کرکه زياتيږي که چيرې هغوی بيا هم په جګړه ټينګار کوي، افغان ولس مجبور دی چې په وړاندې يې سرتاسري پاڅون او قيام وکړي او د وسلې په زور يې له هيواد څخه وتلو ته اړ کړي.
د تړون په موده کې د جګړې د ګراف راټيټولو سره طالبانو خپل ډير پام دعوت او مطبوعاتي جګړې ته اړولی دی او په مټ يې هغوی وکولای شو، تيروتي هيواد وال په دې قانع کړي چې د دښمن له صف څخه لار جلا کړي او په کور کښيني.
بل لور ته د طالبانو افرادي قوت هم ورځ تر بلې په زياتيدو ده، ليکې يې تر هر بل وخت پياوړې، مورال يې لوړ او جهادي جذبه يې څپڅپانده ده. امريکا که هرڅومره زور ووهي نه د تاريخ مخ بدلولی شي او نه افغان ولس ايل کولی شي، له اشغال کرکه د افغانانو په خټه کې اغږل شوې، تاريخ ثابته کړې چې افغانانو هيڅ کله ښکيلاک ته سر نه ده ټيټ کړی، د خپلواکۍ جګړو وخت په بر کې نيولی خو آخر بری بيا هم د مسلمانو افغانانو په برخه شوی.
په لنډه توګه ويلی شو چې د دوحې تړون ماتول به امريکايې ځواکونو ته په ډيره درنه بيه تمام شي او داسې وخت به راشي چې بيا به طالبانو ته د ډيرو سترو امتيازاتو په منلو د تيښتې لار غواړي خو دا غوښتنه به يې نه منل کيږي.
