کابل ټکی کام (جمعه، ۱۵ کب، ۱۳۹۹ل)
د راپورونو له مخې کندهار ولایت کې طالبانو ۵۳ تنه دولتي عسکر، چې د بیلا بیلو جګړو پر مهال نیول شوي وو، له زندان څخه خوشې کړي دي.
د طالبانو ویاند قاري محمد یوسف احمدي پرخپله ټویټرپاڼه د یو پیغام په خپرولو سره ویلي:« نن ورځ د کندهار په ولایت کې د امیرالمؤمنین د عفو له فرمان سره سم د کابل ادارې ۵۳ تنه عسکر، چې د مجاهدینو له خوا د بیلابیلو جګړو په مهال نیول شوي وو، له بند څخه آزاد او خپلو کورونو ته و استول شول».
بايد وويل شي چې دا لومړی ځل نه دی چې طالبان د کابل ادارې نیول شوي عسکر او کارکوونکي خوشې کوي، بلکې تر دې وړاندې يې هم له ضمانت اخيستو وروسته، چې بیا به دغه عسکر دولت سره کار نه کوي، ګڼ شمېر عسکر خپلو کورنيو ته سپارلي.
