کابل ټکی کام (دوشنبه، ۱۸ کب، ۱۳۹۹ل)
د حزب اسلامي ګوند مشر انجینر (ګلبدین حکمتیار) آریانا نیوز سره په یوې ځانګړې مرکه کې یو ځل بیا د کابل حکومت چارواکي په هدفي وژنو کې ښکیل بللي او ګواښ یې کړی که کابل حکومت په لسو ورځو کې هدفي وژنې بندې نه کړي، د منتظمینو نومونه به يې افشا کړي.
حکمتیار د مشارکتې حکومت د جوړولو په هکله د خلیلزاد وروستۍ طرحه هم ناکامه بللې او یو ځل بیا یې د یو داسې مؤقت حکومت په جوړولو ټینګار کړی چې له طالبانو سره د سولې خبرې رهبري کړي.
حکمتیار دغه راز دوحه کې د کابل حکومت د مرکچي ټیم جوړښت نامناسب بللی او په خبره یې باید طالبانو سره د خبرو لپاره یو داسې ټولشموله پلاوی ولیږل شي چې په ټوله معنی د ولس استازیتوب وکړای شي.
باید وویل شي چې حکمتیار داسې مهال دا څرګندونې کوي چې د افغان سولې لپاره د امریکا ځانګړي استازي زلمي خلیلزاد له افغان سیاسي مشرانو وروسته د مشارکتي حکومت طرحه دوحه کې طالبانو سره شریکه کړې او دا مهال یې طالبان په ارزونه بوخت دي.
