دا چې دامريکايي عسکرو د وېستلو لپاره په دوحې تړون کې ټاکل شوی ضرب الاجل دا دی نږدې يوه مياشت اته ويشت يا نهه ويشت ورځې وروسته پوره کيږي، خو لا هم امریکا د ډانګ او پړانګ تر منځ ده او نه پوهېږي چې په افغانستان کې پاتې شي او که ورڅخه لاړ شي، امريکايي ډپلوماټان هم امریکا ته غوڅه مشوره نشي ورکولی چې پوځونه وباسي او که يې پرېږدي.
له کومه وخته چې امريکا په افغانستان کې له طالبانو سره د دوحې تړون لاسليک کړ، له هماغه وخته د امريکا مبهمه پاليسي روانه ده او هيڅ معلومات يې نه کيږي چې د افغانستان په باب به دوی څه وکړي؟ خو څه موده مخکې چې جوبايډن د افغانستان په اړه له ناټو هېوادونو سره په مشورو بوخته و، امريکايي استخباراتو نوموړي ته د خطر د زنګ په ډول وويل چې که چېرې امریکا د پوځونو په وېستلو کې له افغانستان څخه بيړه وکړي نو ډېر ژر به د افغانستان ټوله خاوره د طالبانو لاسونو ته ولېږي.
دا چې طالبان تړون ته مکمل او بشپړ ژمن دي او هيڅکله دوی ته د اسلام مبين دين له تړون څخه د په شا کېدو او نه ژمنتيا اجازه نه ورکوي نو پر همدې اساس تقريبًا د څه باندې کال په موده کې امريکا لا داسې برید نه دی ثبت کړی چې طالبانو دې په کوم امریکايي بېس يا قرارګاه کړی وي او امریکايانو دې پکې تلفات لري وي. خو امريکا د تړونونو په ماتولو کې نړيوال ريکارډ او تاريخ لري نو اوس طالبانو ته هم د شک په سترګه ګوري. که څه هم طالبانو پخپلو ټولو کړيو ژمنو کې وفا ښودلې او دا يې له امریکايي لوري سره وعده کړې چې هيڅکله به هم کوم چا ته اجازه ورنکړي چې د افغانستان خاوره د امریکا په خلاف استعمال کړي. خو دامریکا باور په دې برخه کې د نړيوالو استخباراتو د کاذبو راپورونو او د کابل ادراې د ناسمو معلوماتو پر اساس د صفر درجې ته راښکته شوی.
په اصل کې امریکا له دې وېرېږي چې اسلامي شريعت او دين ټول مسلمانان سره وروڼه بولي نو ځکه که چېرې موږ (امريکا) په کوم اسلامي هېواد باندې په راتلونکي کې هر ډول حمله يا يرغل کوو، نو ښايي د اسلامي شريعت له مخې طالبان دغه حمله او يرغل وغندي.
خوامريکا په دې اړه هم تشويش لري چې که چېرې د مۍ مياشتې له لومړۍ نېټې څخه وروسته خپل عسکر په افغانستان کې پرېږدي نو د طالبانو له لوري به له خورا سختو او شديدو بریدونو سره مخ شي، بل دا چې نړيوال ورپاته حيثيت به يې بلکل دا ځل په صفر کې ضرب شي.
همداشان امریکايي لوری له دې هم وېرېږي چې له طالبانو سره رامنځته شوې د ډاډ، مذاکراتو، تړون او امن فضا چې د تړون په نقض سره مکمله زيانمنه شي، بيا ځل جوړېدله به يې امريکا ته خورا ستونزمن کار وي، که جوړېږي هم نو ښايي نړيوال کلک ضامنين وغواړي.
د دې تر څنګ له طالبانو سره د امريکا له لوري د تړون نقض تر ټولو لوی زیان دا هم دی چې امريکا به د نړیوالو سيالانو (چين، روسيه، شمالي کوريا او نورو) تر منځ سخته وشرمېږي او په تندي به يې دتړونونو د نقض يو تور داغ پاتې شي، چې بيا به هيڅوک هم په نړيواله کچه اعتبار نه ورباندې کوي.
همداشان د امريکا او اروپا تر منځ خپلمنځي او ناټوييزې اړيکې هم د ټرمپ له دورې څخه خورا سُستې شوې وې، اګر که امريکايي نوې ادارې خورا زياتې هڅې هم وکړې تر څو دغې سړې اړيکې يو ځل بيا ورغوي خو اروپا اوس په دې تکل کې ده چې خپله اروپايي اتحاديه جوړه کړي او فکر کوي چې تر څو به د امريکا لپاره په بې ګټو جګړو کې ښکيل وي او د دوی لپاره به قرباني ورکوي. چې دا امریکا ته خورا سخت او دروند زیان دی.
نو له دې امله امريکا د افغانستان په اړه د ډانګ او پړانګ تر منځ ده نه غوڅ اعلان کولی شي چې له افغانستان څخه به ټول پوځونه د راتلونکې مياشتې تر لومړۍ نېټې باسو، او نه هم داسې ويلی شي چې له افغانستان څخه نه وځو.
