غني که رښتيا هم سولې ته لېوالتيا لرلای او سوله يې غوښتلی نو له طالبانو سره يې بايد د دوحې تړون له لاسليک وروسته د يوه افغان شموله اسلامي نظام پر راتګ توافق کړی وای، د طالبانو پنځه زره کسه بنديان به يې پروسکال ازاد کړي وای او همدارنګه د دوحې تړون مطابق يې سوله غوښتې وای…
خو غني تېر تقريبًا يو کال مکمل د سولې پر سبوتاژ کولو تېر کړ، د دوحې تړون د نقض کولو لپاره يې هلې ځلې وکړې او د امريکايانو د شتون عذرونه او زارۍ يې امريکايي لوري ته وکړې، چاپو او پر عام افغان ولس يې وحشتونو ته يې زور ورکړ او مرموزې وژنې يې پيل کړې او هغه وګړي يې ترور کړل او وې وژل چې په افغانستان کې يې د اسلامي نظام د راتګ ملاتړ کاوه…
خو اوس چې د امريکا له لوري پرې حقيقي زور واچول شو او غني هم د امریکايي لوري مجبوريت درک کړ، نو يې د سولې لپاره له خپل واک څخه استعفا وړاندې کړه او يوه درې اړخيزه طرحه يې د دې لپاره وړاندې کړه چې د ترکيې په راتلونکي جوړېدونکي کنفرانس کې پرې بحث وکړل شي او په دې تمه چې د ده له درېوو وړاندې شويو طرحو څخه دې يوه ومنل شي، درې طرحې يې پخپل تبيت جوړې او بيا يې له ځان سره وساتلې.
د دې تر څنګ امريکايي لوري تېر مياشت د خليلزاد په لاس ښکيلو غاړو ته د سولې په تړاو هم یوه طرحه وړاندې کړې چې ګوندې افغانان به پدې طرحه راضي شي او وبه يې مني…
خو غني بيا خپله طرحه د امريکايي طرحې بديل بللې او له ټولو لوريو څخه يې غوښتي تر څو دغه طرحه ومني او د دې طرحې مطابق سوله وکړي…
د غني جوړه شوې طرحه له څو لاندې وجوهاتو ناچله او ناوخته ده…
۱ــــ دغه طرحه درې پړاوونه لري چې لومړی پړاو يې د غني د واک د ختمېدو لپاره اجماع رامنځته کول، سياسي جوړجاړی او د طالبانو له لوري د نړيوالو تر څار لاندې اوربند منل.
د غني د طرحې دويم پړاو کې بيا د سولې د حکومت رامنځته کول او د نوي سياسي سيستم جوړول دي.
په درېيم پړاو کې د جمهوريت د اساسي قانون نوی چوکاټ جوړول او د کډوالو ادغام او بېرته راستنېدل دي.
د دغې طرحې تر ټولو له عقله لرې خبره دا چې غني وايي د طالبانو له لوري د اوربند څارنه به د نړيوالو؟ له لوري کيږي. غني د نړيوالو اصطلاح د دريم ګړو لوريو لپاره نه کاروي بلکې د اوسنيو امريکايي او ناټو د اشغالګرو لپاره دی همېشه د نړيوالو اصطلاح کاروي او کارولې يې ده، نو په داسې حال کې چې طالبانو شل کاله د همدې نړيوالو يرغلګرو په وړاندې جهاد او مبارزه وکړه، اوس به افغان ملت اجازه ورکړي چې د همدې نړيوالو تر څار لاندې اوربند وکړي؟ او يا هم يو نظام رامنځته کړي؟ د همدې نړيوالو تر څار لاندې خو د بن کنفرانس هم تر سره شو چې په ترڅ کې يې اوسنی جمهوريت رامنځته شو!
۲ــــ هر کله چې د غني د حکومت د ختمېدو په تړاو يوه لويه اجماع رامنځته شي او طالبان هم د دغې اجماع تائيد کړي نو پخپله د غني او د ده د ټيم تر پوښتنې لاندې واقع کيږي، ځکه چې د غني دا ډول له واکه لرې کېدل به د ده په اصطلاح قانوني حيثيت ولري او هر کله چې دغه قانوني حيثيت؟ طالبان ومني نو بيا خو دا معنی لري چې د غني تېره واکمني هم طالبانو ومنله.
۳ـــ د غني دويمه طرحه پر سياسي جوړجاړي راڅرخي چې سياسي جوړجاړی غني او د جمهوريت حاکم ټیم د واک وېش ته وايي، خو طالبانو که د واک پر وېش باور لرلی او دغه کار ته يې غاړه ايښودلی نو د ټرمپ په حاکميت کې په مذاکراتي بهير کې تقريبًا شپېته يا اويا سلنه واک ورسره منل شوی ؤ، طالبانو هغه وخت ولې دغه طرحه له امريکا سره نه منله؟
طالبان او افغان ملت پر دې باور دي چې د واک وېش او سياسي جوړجاړی د افغانستان مشکل نشي حل کولی، بايد ټول لوري پر يوه اسلامي نظام توافق سره وکړي او هر يو کار اهل کار ته وسپاري، سياسي واک اهل او ازادو مسلمانو افغانانو ته وسپارل شي.
نو له دې امله د غني طرحه د ناوختيا او ناچلتيا سره سره له ټولو اړخونو څخه د افغان کشالې په حل کې نيمګړې او ناقصه ده او نشي کولی يو ازاد او اسلامي افغانستان تأمين کړي.
