کابل ټکی کام (چهارشنبه، ۱۸وری، ۱۴۰۰ل):
نن سهار د ننګرهار ولایت د جلال اباد ښار دوهمه ناحیه کې په رینجر موټر د چاودنې له امله شاوخوا ۲۰ تنو ته مرګ ژوبله اوښتې ده.
عیني شاهدان وایي، چاودنه د دوهمې ناحیې اړوند لغمان هډې تر څېرمه په یوه ګلدان کې ځای پر ځای شوي ماين له امله د رینجر د تېریدو پر مهال رامنځته شوې ده.
خو ځینو سرچینو ویلي، چاودنه په رینجر پسې د مقناطیسي ماین په واسطه شوې.
امنیتي سرچینو په لومړیو کې د دوو پولیسو د وژل کېدو او د یوه پولیس د ټپي کېدو تر څنګ د اتلس ملکیانو د ټپي کېدو خبر ورکړ.
خو د ننګرهار د حوزوي روغتون ویاند ګلزداه سنګر وایي، د پېښې له ځایه روغتون ته ۱۸ ټپیان او دوه جسدونه وروړل شوي دي.
د سنګر په وینا، وژل شوي دوه تنه ملکیان دي او ټپيانو کې درې پولیس او پاتې ۱۵ کسان ملکي وګړي دي.
