کابل ټکی کام (پنجشنبه، ۱۹ وری، ۱۴۰۰ل)
له هغه وروسته چې تېره ورځ د کابل حکومت د مشر لومړي مرستیال امرالله صالح ادعا وکړه، چې کابل ښار کې یې وروستیو هدفي وژنو کې ښکیل د طالبانو اړوند یوه لس کسیزه ډله نیولې، طالبانو یې ادعا رد کړې او وایي د کابل ادارې له لوري نيول شوي کسان موږ پورې اړه نه لري.
د طالبانو ویاند “ذبیح الله مجاهد” پر خپله ټویټرپاڼه لیکلي: «د مزدور دښمن دا ادعا چې ګني کابل کې یې د یو شمیر چاودنو او بریدونو په تړاو د اسلامی امارت د مجاهدینو کوم لس کسیز ګروپ نیولی، حقیقت نه لري. په دې اړه چې دښمن کومه ویډیو خپره کړې، هغه جعلي او د دښمن تزویري کړنه ده، موږ یې ردوو.»
باید وویل شي چې د کابل حکومت د ملي امنیت ادارې د نیول شویو کسانو یوه ویډیو هم خپره کړې وه او ادعا یې کړې وه چې نیول شوي کسان د خبریال “یماسیاوش” په وژنې کې هم لاس لري، خو د یماسیاوش پلار وایي چې د سیاوش د وژل کېدو د قضیې په اړه د کابل حکومت د چارواکو ضد او نقیض څرګندونو ته په پام، باور نه کوي چې قاتلان دې نیول شوي وي.
