کابل ټکی کام (شنبه، ۱۲ لیندۍ، ۱۴۰۱ل)
کابل کې د پاکستان د اسلامي جمهوریت د سفارت پر ودانۍ تر پروني برید وروسته د یاد هېواد د بهرنیو چارو وزارت په یوه خبرپاڼه کې ویلي، چې اسلام اباد د سفارت د تړلو او له کابله د خپلو دیپلوماتانو د ایستلو پلان نه لري.
د پاکستان د بهرنیو چارو وزارت ویلي، د دغه برید موخه د دغه هېواد د سفیر وژل وو، خو نوموړی ښه دی او یو ساتونکی یې سخت ټپي شوی دی.
رویټرز خبري اژانس د پاکستان د بهرنیو چارو د وزارت د ویاند له قوله ویلي، اسلام اباد د سفارت د تړلو او له کابله د خپلو ډیپلوماټانو د ایستلو کوم پلان نه لري او دوی په افغانستان کې له سرپرست حکومت سره په تماس کې دي چې د پاکستاني ډیپلوماټانو د خوندیتوب لپاره امنیتي وضعیت ښه کړي.
په ورته مهال د پاکستان د بهرنیو چارو وزیر بلاول بوټو زرداري په کابل کې د پاکستان پر سفارت د برید په اړه د افغانستان د بهرنیو چارو له وزیر امیرخان متقي سره ټیلیفوني خبرې کړې دي.
د افغانستان د بهرنیو چارو وزارت پرون جمعه د لیندۍ پر ۱۱ مه په یوه اعلامیه کې ویلي چې د پاکستان د بهرنیو چارو وزیر له اسلامي امارت سره د ښو اړیکو پر دوام ټینګار کړی دی.
اعلامیې په كابل كې د پاكستان پر سفارت بريد ته په اشارې د دغه هېواد د بهرنيو چارو د وزير له خولې ليكلي، چې دا ډول پېښې د دواړو هېوادونو تر منځ اړيكې نهشي خرابولی.
په همدې حال کې امیر خان متقي د دغه برید د غندلو ترڅنګ ویلي چې د پاکستان د سفارت امنیت ته به ځانګړې پاملرنه وکړي.
متقي همدا راز زرداري ته ډاډ ورکړی چې اسلامي امارت به ډېر ژر د پاکستان پر سفارت د برید عاملین ومومي او سزا به ورکړي.
دا په داسې حال کې ده، چې تېره ورځ د افغانستان د حزب اسلامي ګوند د مشر ګلبدین حکمتیار پر دفتر هم ځانمرګی برید شوی و، چې په پایله کې یې یو شمېر کسانو ته مرګ ژوبله اوښتې وه.
