کابل ټکی کام (سه شنبه، ۲۸ وږی، ۱۴۰۲ل)
د بريتانيايي عالمانو يوې ډلې، چې په دې وروستيو کې افغانستان ته سفر کړی و؛ ويلي، چې په دې هيواد کې رسنيو رښتيني واقعيتونه بشپړ تحريف کړی دی.برېتانيايي عالمانو د لندن د کوئين مريم پوهنتون په يوه غونډه کې د افغانستان د اسلامي ټولنې د جوړېدو له بهيره، امنيت ښه کېدو او اقتصادي وضعيته ستاينه کړې ده.شيخ هيثم الحداد، چې يو له دغو عالمانو څخه دي ويلي؛ د اسلامي امارت د چارواکو د مسلکيتوب کچه، چې هغه ورسره وليدل په رښتيا حيرانوونکې ده.ده زياته کړې: دوی (اسلامي امارت) په رښتيا هم غواړي د خپل هيواد او امت لپاره يو څه وکړي او خدای دې له دوی سره مرسته وکړي. مفتي اسمعيل سطيه ويلي: موږ افغانستان ته پر ډېر خلاص ذهن لاړو؛ زموږ له هېچا سره ټکر رانغي. ما د افغانستان خلک ډېر مهربان، سخاوتمند، د ورين تندي لرونکي او انعطاف منونکي وليدل؛ خو هغه څه، چې پر ما ډېر اغېز وکړ هغه دا دي، چې د صحابه کرامو کيسې مو، چې لوستې وې؛ ورسره مخ شوو. دوی ماته د هغو کسانو يادونه راژوندي کړل، چې د اسلام لپاره يې سرښندنې کړې وې او هر څه کولو ته چمتو و. موږ فکر نه کاوه، چې نن به داسې خلک وي؛ خو هلته له خلکو او عالمانو سره خبرو راته څرګنده کړه، چې دا خلک د همغو صحابه کرامو په شان غيرت لري.شېخ حميد محمود ويلي: افغانستان ته له تللو مخکې مې په رسنيو کې هېڅ مثبته خبره نه وه ليدلې؛ خو د افغان حکومت له غړيو سره له خبرو وروسته پوه شوم، چې دوی نه يوازې له فزيکي تسلط او استعماره د خلاصون هڅه کېږي، بلکې د مالي، اقتصادي او فکري غلامۍ څخه د وتلو په هڅه کې هم دي. شېخ عمار المدني ويلي: د افغانستان هغه انځور، چې موږ يې لرو؛ له شته واقعيتونو سره بشپړ توپير لري. هغه خوښي او اطمينان، چې خلک يې احساسوي؛ له هغه څه څخه، چې د رسنيو د چينلونو له لارې انځورېږي بشپړ توپير لري. زما غوښتنه دا ده؛ هر هغه معلومات، چې تاسې غواړئ هغه بايد د مناسبو چينلونو له لارې وي.دې برېتانيايي پلاوي په جولاي مياشت کې افغانستان ته سفر کړي و او د اسلامي امارت له لوړ پوړيو چارواکو سره يې وکتل.شېخ هيثم الحداد د نجونو د تعليم مسلې ته په نغوته کې ويلي، چې لويديځ له دې مسئلې څخه د افغانستان د بد ښودلو او ځلولو لپاره ګټه پورته کوي.نوموړي زياته کړې: په هره ټولنه کې، چې له جګړې راوتلې وي د اړتياوو خپل يو لړ لري؛ خو امنيت او اقتصاد يې په لومړيتوبونو کې دي.دی وايي: که موږ په رښتيا هم د افغانستان په اړه اندېښمن يوو، نو لومړۍ پوښتنه بايد دا وي، چې امنيتي وضعيت څنګه و؟ ۲۰۲۲ م کال په تېرو څلوېښت کلونو کې لومړي کال و، چې د افغانستان په ټوله سيمه کې جګړه نه وه، چې دا د ستاينې وړ ده. که خلک د ښځو په اړه اندېښمن وي؛ لومړي بايد وپوښتي، چې آيا ښځې ځورول کېږي؟دغه راز شېخ حمد محمود وويل، چې د نجونو زدهکړې او تعليم في نفسه منع شوي نهدی، بلکې ليبرال او سيکولر تعليم ځنډول شوي دي.ده يادونه وکړه، چې د بهرنيو چارو وزارت سرپرست وزير مولوي اميرخان متقي ورته ويلي، چې اسلامي امارت د نجونو زدهکړه حرامه نهګڼي او ټولې نجونې دمګړۍ لومړنۍ زده کړې کوي. دغه راز هغه وويل: که نجونې غواړي ډاکترې او ښوونکې شي او يا په دارالعلوم کې زدهکړې وکړي؛ کولى شي د پوهنتون تر کچې خپلې زدهکړې روانې وساتي.د شېخ حمد د څرګندونو له مخې؛ ښاغلي متقي ويلي، چې پخوا شاګردانو او زدهکړيالانو ته غربي سيکولر افکار پيچکاري کېدل، د شريعت خلاف خبرې کېدې او رذايلو وده کوله؛ نو عالمانو دا موضوع په مستقيمه توګه د اسلامي امارت مشر ته وړاندې کړه. ښاغلي متقي دا هم ويلي، چې موږ شل کاله د جګړې په ډګر کې سره متحد وو او اوس، چې د هيواد د بيارغونې وخت رارسېدلي؛ اختلاف نهشوو زغملي او له همدې کبله ليبرال او سيکولر زدهکړې لنډمهاله وځنډېدې.
