پر يمن د امريکا بريد او سيمې ته يې ناوړه پايلې؟!
د غزې له غميزې دا دی له ۱۰۰ ډېرې ورځې تېرېږي، اسرائيلي اشغالګر د ټولو نړيوالو قوانينو خلاف وحشتونه ترسره کوي او ورځ تر بلې د شهيدانو، زخميانو او بې کوره وګړو شمېر زياتېږي.
نړيواله ټولنه او په ځانګړي ډول لوېديځ، چې تل د بشري حقونو ښايسته شعارونه زمزمه کوي، د دې پر ځاي چې د دغه ناوړه حالت مخنيوی وکړي، په ډېره سپين سترګۍ د اسرائيلو ملاتړ کوي او نه غواړي چې دغه جګړه دې پای ته ورسېږي.
د سيمې هيوادونو او په ځانګړي ډول منځني ختيځ کې مهمو مسلمانو هيوادونو هم له توقع ډېر پڅ او نا مناسب دريځ نيولی او همدا لامل دی، چې د غزې جګړه يو داسې خونړي حالت ته ورسېده. د امريکا په مشرۍ لوېديځ نه يوازې د غزې د جګړې او په مجموع کې د فلسطين په قضيه کې د اسرائيلو سياسي او نظامي همکاري کوي، بلکې دا دي، مخامخ يې په دغې جګړه کې ځان دخيل کړ او پر يمن يې پوځي بريدونه پيل کړل.
دغه بريدونه به د منځني ختيځ لا له وړاندې خراب وضعيت لا ډېر پيچلی کړي او د فلسطين او اسرائيلو جګړه به د سيمې نورو هيوادنو ته وغځوي. اوس هم دغه جګړه لبنان، عراق او دا دی اوس يمن ته غځېدلې ده.
د سياسي چارو د کارپوهانو په باور که څه هم دغه حالت به د امنيت او اقتصاد په برخو کې د اسلامي هيوادونو په زيان وي، خو په مجموع کې به د فلسطين قضيه راژوندۍ کړي او نړۍ به اړه شي، چې دغې ستونزې ته د حل يوه داسې لاره وګوري، چې د فلسطينيانو لپاره د يو خپلواک دولت جوړښت ته لاره هواره کړي او فلسطيني ملت د اشغال شويو سيمو واګي بيا ترلاسه کړي.
که اسلامي نړۍ په دغې جګړه کې خپل ديني او اخلاقي مسئوليت درک او ترسره کړي، نه يوازې د جګړې رخ د فلسطيني ملت په ګټه بدلولی شي، بلکې پر سيمه يې نفوذ او واک هم پراخېږي او له خپلو منابعو په ګټې اخيستنه کې هم خپلواکي ترلاسه کولی شي.
