عطاءالله مبارز
يحيی ابراهيم حسن سنوار په ۱۹۶۲م کال د اکتوبر په ۲۹ مه نېټه د غزې اړوند د خان يونس د کډوالو په يوه کمپ کې زېږېدلی دی.
لومړنۍ زده کړې يې په ياد پنډغالي کې ترسره کړې، ثانوي زده کړې يې د غزې عزيزالدين قسام ښوونځي کې سر ته رسولي او لوړې زده کړې يې د غزې پوهنتون کې پای ته رسولي دي. په عربي ژبه کې دکتورا لري او په انګليسي او عبراني ژبو روانې خبرې کولی شي.
يحيی سنوار د حماس اسلامي غورځنګ له بنسټګرو مشرانو څخه ګڼل کېږي او کلونه يې د ياد غورځنګ په استخباراتي څانګه کې بريالي فعاليتونه کړي دي. نوموړي يو له هغو کسانو څخه هم ګڼل کېږي، چې د حماس اسلامي غورځنګ د پوځي څانګې “القسام” بنسټ يې کېښود. په ۱۹۸۰م کال کې يې د حماس ګوند بسټګر مشر “شهيد شيخ احمد ياسين رحمه الله” ته مشوره ورکړه، چې د فلسطين د خپلواکۍ او فلسطين کې د موساد جاسوسانو د پيژندلو او له منځه وړلو لپاره دې يوه فعاله اداره رامنځته کړي، چې شيخ رحمه الله يې مشوره ومنله او د القسام په چوکاټ کې يې يوه اداره رامنځته کړه چې په نتيجه کې يې سلګونه اسرائيلي جاسوسان چې ډير يې فلسطينيان وو ونيول شول او په پوځي محکمو کې له محاکمې وروسته اعدام شول.
دغه راز يادې څارګرې ادارې ورځ تر بلې پرمختګ کاوه او داسې مهال هم راغی، چې د اسرائيلو په منځ کې يې مهم صهيونيستي مشران په نښه او له منځه يو وړل او له ۱۹۹۰م کال څخه يې تر ۲۰۰۰م کال پورې د اسرائيلو د پلازمېنې تل ابيب په ګډون په ګڼو صهيونيستي ښارونو کې له ۵۰۰ زيات بريدونه ترسره کړل چې زرګونو اسرائيليانو ته په کې مرګ ژوبله واوښته.
يحيی سنوار په ۱۹۸۸م کال کې د صهيونيستانو د څارګرې ادارې “موساد” له خوا ونيول شو او تر ۲۰۱۱م کال پورې د اسرائيلو په بند کې و، چې وروسته د يو اسرائيلي سرتېري په بدل کې سره له ۱۰۰۰ تنو نورو فلسطيني بنديانو خوشې شو.
له خوشې کېدو وروسته يې د حماس اسلامي غورځنګ په داخلي ټاکنو کې برخه واخيسته او يوځل بيا يې د ياد غورځنګ غړيتوب ترلاسه کړ او د “القسام” پوځي څانګې مشر وټاکل شو.
يحيی سنوار په ۲۰۱۷م کال کې يوځل بيا د حماس غورځنګ په داخلي ټاکنو کې بريالي شو او د غزې تړانګې لپاره د حماس سياسي مشر وټاکل شو او د ياد غورځنګ د پوځي څانګې “القسام” لېوا د مشري موده يې هم وغځول شوه، چې وخت نا وخت يې په اسرائيلي ښارونو باندې توغنديز بريدونه او د اسرائيلو په منځ کې کاري بريدونه پلان او ترسره کړل.
يحيی سنوار د تېر ۲۰۲۳م کال د اکتوبر په ۷ مه نېټه د “طوفان الاقصي” په نامه پر اسرائيلو ستر بريدونه پلان او ترسره کړل، چې په پايله کې يې زرګونو اسرائيليانو ته مرګ ژوبله واوښته او سلګونه نور يې د حماس ځواکونو له خوا له نيولو وروسته غزې تړانګې ته يووړل شول، چې تر اوسه هم ورسره بنديان دي. که څه هم اسرائيلو د يادو بريدونو په غبرګون کې پر غزې تړانګې پراخ هوايي او ځمکني عمليات پيل کړي. غزه پر کنډوالو بدله شوې د ښځو او ماشومانو په ګډون ۲۵۰۰۰ ولسي فلسطينيان شهيدان او زرګونه نور ټپيان شوي؛ خو اسرائيل خپلو موخو ته نه دي رسيدلي او د هيڅ کوم زنداني په خوشې کولو نه دي بريالي شوي، د ۳ مياشتينۍ جګړې پرمهال يې ۱۱۰۰ پرمختللي زغروال ټانکونه ويجاړ شوي، د اسرائيلي رسنيو د راپورونو له مخې زرګونو پوځيانو ته يې مرګ ژوبله اوښتې او فکر کېږي، چې، يحيی سنوار، محمد ابو ضيف او د مروان ابو عيسی په ګډون د حماس غورځنګ مهم پوځي مشران لا هم په غزه کې دي او دغه خونړۍ جګړه رهبري کوي.
