کابل ټکی کام (دوشنبه، ۹ سلواغه، ۱۴۰۲ل)
د اردن په شمال کې د سوریې پولې ته نږدې پروني برید ته سپینې ماڼۍ، د هغه هیواد د بهرنیو چارو او دفاع وزارتونو توند غبرګونونه ښودلي دي.
پرون شنبه ماښام د (سلواغې اتمه) د اردن په شمال کې د سوریې خاورې ته نږدې یوې بې پیلوټې الوتکې د امریکایي پوځیانو پر اډې برید کړی، چې په پایله کې یې درې امریکایي پوځيان وژل شوي او ۷۰ نور ټپیان دي.
داسې ویل کېږي چې ځیني امریکایي پوځیان د مغزي ضربي له کبله له دغه پوځي اډې ویستل شوي او روغتونونو ته وړل شوي دي.
دغه راز په یاد برید کې ۷۰ تنه نور امریکایي ځواکونه هم ټپیان شوي، چې واشنګټن یې ټپیونه برسیرن بولي او په وینا یې چې بېرته چوپړ ته ورګرځېدلي دي.
بل پلو، په ملګرو ملتونو کې د ایران دایمي استازي په یوه بیان کې اعلان وکړ چې اسلامي جمهوریت د اردن او سوریې پر پوله د امریکايي ځواکونو له بریدونو سره چې په پایله کې یې ۳ امریکايي پوځیان وژل شوي؛ اړیکه نه لري. د ایران د بهرنیو چارو وزارت وایي چې په سیمه کې جنګېدونکې ډلې له دوی دستور نه اخلي او نه هم د تهران په خوښه جنګیږي؛ خو په خبره یې چې دا بریدونه هغو ډلو کړي، چې تهران یې د مقامت جنګیالي بولي.
اعلامیه وړاندې وایي: (( دغه برید په ایران پورې مستقیم تړاو نه لري. امریکا په سیمه کې د مقاومت له ډلو سره په جګړو بوخته ده.))
ایران پلوو جنګالیو ډلو په دې وروستیو کې په سیمه کې پر امریکایي او اسراییلي ځواکونو بریدونه زیات کړي دي.
د امریکا ولسمشر جو بایډن ګواښ کړی چې ددې برید ځواب به ورکړي. بایډن ویلي چې دا برید د ایران له ملاتړه برخمنو ډلو کړی چې په سوریه او عراق کې فعاله دي.
سپینې ماڼې د جوبایډن له قوله په یوه خپره کړې اعلامیه کې ویلي: (( امریکا خواشینې شوې. د اردن په شمال کې د سوریې پولې ته نږدې د بې پیلوټه الوتکې په برید کې مو د خدمتي عسکرو درې مړه او لسګونه نور ټپیان دي. موږ لا هم د حقایقو پر ټولولو بوخت یو، خو پوهیږو چې دا برید ایران پلوو جنګیالیو کړی، کوم چې په سوریه او عراق کې فعالې دي.))
په ملګرو ملتونو او افغانستان کې د امریکا پخواني سفیر زلمي خلیلزاد د ایران پلوه وسله والو په برید کې د دریو امریکایي پوځیان د وژلو په غبرګون کې د برحاله ولسمشر جوبایډن پالیسې غندلې ده. خلیلزاد وایي چې د بایډن پالیسي ناکامه شوې او اوس یې وخت دی چې ایران د دغه برید دروند پور پرې کړي. خلیلزاد جمهوریت پلوی دی او له خپلو مشرانو یې غوښتي چې د ایران اهداف دې په نښه شي.
اوسمهال شاوخوا ۲۵۰۰ امریکايي سرتېري په عراق او شاوخوا ۹۰۰ نور په سوریه کې پراته دي. امریکا په ښکاره داسې ښکاروي چې ګوندې ځواکونه یې د خپلو متحدانو د ساتنې او د داعش او کرد جنګالیو د ځپنې په موخه په سیمه کې مېشت کړي؛ خو د کتونکو په باور امریکایي پوځیان په سیمه کې د داعش خلاف نه بلکې د اسرائیلو د ګټو ساتلو لپاره میشت دي.
د ویلو ده، چې د عراق د اسلامي مقاومت سازمان په نامه وسله والې ډلې، چې په عراق اوسوریه کې فعالیت کوي. د یادو بریدونو مسؤلیت منلی دی او ادعا یې کړې ده، چې سلګونو امریکایي پوځیانو ته یې مرګ ژوبله اړولې ده.
