کابل ټکی کام (چهارشنبه، ۱۸ سلواغه، ۱۴۰۲ل)
ټاکل شوې، سبا پنجشنبه د فبروري په اتمه په پاکستان کې سرتاسري ټاکنې وشي؛ خو د روڼتیا په اړه یې سر له اوسه ګونګوسې خپرې شوي دي.
سبا پنجشنبه د فبرورۍ په اتمه به پاکستانیان د دغه هېواد د مرکزي او ايالتي پارلمانونو د غړو د ټاکلو لپاره د رايې ورکولو مرکزونو ته ولاړ شي.
د پاکستان د ټاکنو خپلواک کمیسیون ویلي چې دوی سبانۍ ورځې ته چمتووالی لري او تر دې دمه دغو ټاکنو ته تر ۱۲۰ میلیونو کسانو نوملیکنه کړې ده.
بل خوا، د چارو شنونکي او د پاکستان عامه وګړي پر دغو ټاکنو ډېر باوري نه دي. د یوې پوښتل شوې ټولپوښتنې په ترڅ کې ویل شوي چې په پاکستان کې له لسو تنو اووه تنه قدغن پر ټاکنو باور نه لري.
که څه هم د پاکستان د ټاکنو کمیسیون د رڼو ټولټاکنو د ترسراوي هیله ښکاره کوي، خو له ټاکنیزو کمپاینرانو، کاندیدانو او نورو ګوندونو سره دوه ګونی چلند پر دې ټاکنو څوک ډېر نه باوري کوي.
د ګالپ څېړنیز مرکز هم په یوه نوي راپور کې ویلي چې په دې وروستیو کلونو کې د دغه هېواد پر ټاکنو د پاکستاني وګړو بې باوري ډېره شوې او له لسو څخه اووه پاکستانيان باور نه لري چې ټاکنې دې رښتینې وي.
د پاکستان پخوانی صدراعظم عمران خان په زندان کې دی او د هغه په مشرۍ د تحریک انصاف ګوند هم په انتخاباتو کې له ګډون منع شوی دی.
ښاغلی خان له ټاکنو منع او زندانی دی، همداراز د نوموړي د ګوند کاندیدان ډول ډول ځورول کیږي او په یوه نه یو ډول یې اوسمهالی حکومت په مخکې خنډونه رامنځته کوي.
عمران خان د قیمتي دولتي ډالیو د پلور، د پټو دولتي اسنادو په ښکارونه او له شرعې سره د ټکر واده له کبله په کلونو کلنو حبس محکوم شوی دی.
د تحریک انصاف ګوند ګڼ کاندیدان یا هم په خپلو کورونو کې پټ دي او یا هم په ښکاره خپل ټاکنیز کمپاینونه نه شي کولی. دوی ګیله کوي چې ټاکنیزې تابلوګانې او بینرونه یې شکیږي او یا یې هم په پټه کمپاینونه ترسره کیږي. د تحریک انصاف ګوند څخه ټاکنیزه نښه(بېټ) هم لیري شوې. ددغه ګوند معترضین وایي چې د انتخابي نښې په بدلون به خلکو ته دا پوهاوی سخت وي چې د تحریک انصاف ګوند کاندیدانو ته رایه ورکړي. د هغه هیواد په ګڼو ایالتونو کې د عمران خان ملاتړي شته او ګڼ ځوانان یې ننګه کوي.
که څه هم د نواز شريف په مشرۍ د مسلم ليګ ن ګوند ښه کمپاین کړی چې نواز شريف يوځل بيا د پاکستان صدراعظم شي، خو د کارپوهانو په اند د عمران خان په مشرۍ د تحريک انصاف ګوند په ګټه کاندیدان او د بلاول بوټو زرداري په مشرۍ د پیپلز پارټۍ استازي به هم په دې ټاکنو کې مهم رول ولوبوي.
په پاکستان کې دا ټولټاکنې په داسې حال کې ترسره کیږي چې په دغه هیواد کې امنیتي پېښې او بریدونه هم تر پخوا څو چنده زیات شوي دي.
تازه د پاکستان په بلوچستان ایالت کې یوې چاودنې ۱۴ تنه وژلي او شاوخوا ۲۰ تنو نورو ته یې مرګ ژوبله اړولې ده.
ویل کیږي چې دا چاودنه کویټې ته نږدې په پښین ښار کې د پارلماني ټاکنو د یوه نوماند په دفتر شوې ده. په خبر کې نه دي ویل شوي چې دا چاودنه د کوم نوماند پر ټاکنیز دفتر شوې، خو یو شمېر خبریالانو لیکلي چې د برید موخه د اسفندیار کاکړ په نوم د یوه خپلواک کاندید دفتر و.
اسوشېټېډ پرېس خبري اژانس د بلوچستان ایالت د مطبوعاتو د ویاند جان اڅکزي په قول ویلي چې په دې برید کې شاوخوا ۲۰ ته مرګ ژوبله اوښتې ده. اڅکزی زیاتوي چې ددې چاودنې د ځینو ټپیانو حالت نازک دی او ښایي د مړینې کچه لوړه شي.
ددې برید مسوولیت لا هېڅ ډلې په غاړه نه دی اخیستی.
بل خوا، په بلوچستان کې د انتخاباتو د کمیسیون مشر محمدفرید اپريدي نن مشال راډیو ته وویل چې په دې ایالت کې امنیتي ستونزې شته خو هغه ډاډ ورکړ چې چارواکو پوره امنیتي تدابیر نیولي دي.
اپریدي زیاته کړه: ((پوره تدابیر نیول شوي دي. ټاکنې به د امن په فضا کې ترسره شي. د بلوچستان د هر کاندید او ټاکنیزې حوزې امنیت پوره پوره نیول شوی. خلک کولی شي، ډاډه د رای اچونې مرکزونو ته ورشي.))
د سبا په انتخاباتو کې د ګډون لپاره له ۱۲۰ میلیونو څخه زیاتو پاکستانیانو نوملیکنه کړې ده. د پاکستان ملي پارلمان ۳۳۶ څوکۍ لري چې ۲۶۶ استازي یې د مستقیمو رایو له لارې ټاکل کېږي.
د پاکستان د پارلمان په پاتې اویا څوکیو کې شپېته څوکۍ د ښځو او لس څوکۍ د غیر مسلم اقلیتونو لپاره ځانګړې شوې دي.
دا ټاکنې په داسې حال کې ترسره کیږي چې ډېری کاندیدان لا له وړاندې ناراضه او ګیله من دي.
