د ګټل شوې خپلواکي ساتل او ګډ مسولیت!

دا دریم کال دی، چې افغان ملت له شوروي اتحاد اخيستل شوې ازادي داسې مهال لمانځي، چې هيواد مو د امپرياليستي اشغالګرو له منګولو آزاد شوی او ملت مو د الله تعالی په مرسته او د بې سارو قربانيو په بدل کې د آزادۍ اوهوساينې ساه اخيستې.
که څه هم د اشغالګرو پر وړاندې د مبارزې او مقاومت په محاذ کې مو ګڼ شمېر هيوادوال شهيدان، ټپيان او تري تم شول، ښارونه او کلي مو ويجاړ شول او د ترقۍ او پرمختګ له کاروانه کلونه-کلونه وروسته پاتې شوو؛ خو معنوي ارزښتونه مو وساتل، آزادي مو واخيسته او اوس الحمدلله د يو بشپړ خپلواک او اسلامي نظام څښتنان يو.
د ۱۳۵۸ل کال دجدي مياشتې په شپږمه نېټه د هغه وخت شوروي اتحاد پر افغانستان يرغل وکړ، هغه مهال شوروي اتحاد د نړۍ په کچه ستر ځواک ګڼل کېده او د هيوادونو د استعمار او استثمار فکر کرارکېناستلو ته نه پرېښوده. شوروي ځواکونو د خپل څه دپاسه ۹ کلن اشغال پر مهال له هېڅ راز وحشت څخه دريغ ونه کړ، د مېرمنو او کوچنيانو په ګډون يې سلګونه زره بې ګناه افغانان شهيدان، زرګونه نور يې تري تم او ميليونونه يې هجرت کولو ته اړ کړل، د هيواد زيربنا، ښارونه او کلي يې هم ويجاړ کړل.
خو افغان ملت يې پر وړاندې تسليم نشو، بلکې د هيواد د آزادۍ او خپلواکۍ د بېرته اعادې لپاره يې د تن په وينو سخته مبارزه وکړه، نږدې يونيم ميليون هيوادوال موشهيدان شول، د همدغو بې سارو قربانيو برکت او د متعال خدای نصرت و، چې د ۱۳۶۷ل کال د دلوې مياشتې په ۲۶مه نېټه د سرو لښکرو وروستی عسکر هم د افغانستان له سپيڅلې خاورې ووت.
نن افغان ملت له شوروي اتحاد څخه د خپلواکۍ اخيستلو ۳۵ مه کليزه په داسې حال کې لمانځي، چې امريکا او ناټو ته د ماتې ورکولو ستر وياړ هم لري، په ټول هيواد کې سرتاسري امنيت تامين دی، د ظلم او وحشت مخه نيول شوې، پر ټول هيواد يو مرکزي اسلامي نظام حاکم دی، د بيا رغونې او پرمختګ کارونه په چټکۍ سره روان دي.
د ازادۍ او خپلواکۍ له سروکي سره د قربانۍ او کړاو توري هرو مرو ذهن ته راځي، اوس چې افغانستان خپلواک او امن هيواد دی، دا د ميليونونو مخلصو افغانانو د قربانيو پايله او نتيجه ده او ازادي موږ ته په ډېر لوړ قيمت تمامه شوې ده؛ اوس زموږ ټول افغان ملت او حکومت مسؤليت او دنده ده، چې دغه خدای راکړې ازادي وساتو، د حکومت مسؤليت دادی، چې د ظلم او فساد مخنيوی وکړي، د چارو واګې د اهليت له مخې خلکو ته وسپاري، د ملت ټول مشروع حقونه ورکړي، په ځانګړې توګه د هوسا ژوند او د علم او پوهې ترلاسه کولو حق، دين، هيواد او خپلواکۍ سره د مينې او تل پاتې اړيکې لپاره بايد ښوونيزو نصابونو کې دغو مضامينو ته ډېر ځای ورکړل شي. او ملت مسؤليت دا دی، چې د موجوده اسلامي نظام کلک ملاتړ وکړي، د قانون په تطبيق، د جرمونو مخنيوي، د امنيت تامين او د ټولګټو پروژو ساتلو کې امنيتي ځواکونو سره اوږه پر اوږه ودريږي.
لوديځه نړۍ او ځينې نور هيوادونه به خامخا د خپلو سياسي او اقتصادي ګټو او دغه راز له افغان ملت څخه د خپلې ماتې د کسات اخيستو په پار يو ځل بيا د افغانستان د نا امنه کولو هڅې کوي؛ خو موږ ټول افغانان بايد د قوم، سمت، ژبې او ګوند له توپيرونو پرته د هيواد د ازادۍ ساتلو او دغه راز د هيواد د ځان بسياينې لپاره په ګډه هڅې او کوښښونه وکړو.
لنډه دا چې موږ بايد يوازې له انګريزانو، شوروي اتحاد او ناټو څخه د خپلواکۍ اخيستو د ورځو په لمانځلو بسنه ونه کړو، بلکې د هيواد د ازادۍ او خپلواکۍ ساتلو او پاللو لپاره عملي ګامونه پورته کړو. په سياسي ، اقتصادي او فرهنګي برخو کې د نورو اغېز او اثر ته اجازه ورنه کړو. د خپل هيواد د ځان بسياينې او پرمختګ لپاره په هماغه کچه هڅې وکړو، لکه د خپلواکۍ اخيستو لپاره مو چې کولې.