لیکنه: ابوحمزه شهیدزوی
د اطلاعاتو او فرهنګ وزارت د پام وړ!
بې له شکه، چې حریت/ آزادي د اسلام له خواږه او قیمت بها نعمت څخه وروسته په نعمتونوکې ستر او خوږ نعمت دی.
الله عزوجل ته بې پایه حمد او ثنا، چې موږته یې په داسې حال کې دا ستر نعمت (آزادۍ) رابښلې، چې زموږ په جهاد پال ټاټوبي (افغانستان) د امریکا په مشرۍ د نړۍ وال صلیبي ائتلاف تر هجوم راوړلو وروسته چا دا ګومان هم نه کاؤ، چې په کابل او ټول هېواد دې یوځل بیا د اسلام سپین بیرغ رپاند شي، خصوصا هغه مهال کله، چې دلته د ایمان پلورونو مفکرانو(!) له خوا امریکایي جنایتکارانوته د دائیمي پوځي اډو د شتون لاسلیکونه هم شوي ؤ.
خو ایکاش، چې دغه آزادۍ مو د فکري آزادۍ تر پولو هم غځېدلې وای. موږ ولې هېر کړي، چې امریکایانو له نظامي تيري مخکې په افکارو تیری پیل کړی ؤ؟ د مصنوعي سپوږمکۍ له لارې د آرمان په نوم راډیو خپرونې او لا په ټول هیواد د صلیبیانویانو او ایمان پلورونکو ولکه نه وه ټینګه شوې، چې امریګایانو آن له اروپاڅخه د آزادۍ(!) راډیو خپرونې پیل کړې او تر ۱۳۹۶ کال پورې د کابل په ګډون په ټول هېوادکې شاوخوا ۳۵۰ راډیو ګانې او ټلویزیونه فعالول او تر ډېره د ۲۴ ساعته خپرونو لرلو اثرات به یوازې د فزیکي اشغال تر شتون پورې ؤ؟ او که به د فزیکي اشغال تر خاتمې وروسته هم وي؟ بې له شکه، چې د اشغال له خاتمې وروسته او که کار ورته و نه شي ـ الله مه کړه ـ تر پېړیوپورې به هم دوام کوي.
زه نه غواړم، چې د فکري جګړې د پیل نېټې ته لاړشم؛ خو امریکایانو د صلیبي جګړې د پرمخ بیولو لپاره، چې له ۲۰۰۰۱ کال را په دې خوا د اسلام خلاف کومه فکري جګړه پیل کړې دا د فکري جګړو په تاریخ کې بې سارې جګړه بلل کیږي.
په افغانستان کې د الله عزوجل په نُصرت د امریکایانو د فاحش شکست جبران هم ښایي دلته د هغوی د فکري جګړې په ژورو اغېزوکې نغښنی وي. هغه اغېزې، چې د له منځه وړلولپاره یې اوس هم له بده مرغه هیڅ اغېزمن اقدام نه دی شوی. دا په داسې حال کې، چې زموږ په ټولنه کې ډېری وګړي، خصوصا ځوانان تر ډېرې کچې فکرا اشغال دي او لاهم د دښمنانو د تشخیص درک په کې کمزوری دی، ځکه خو ټولنه د داډول وګړو له لوري په راتلونکي کې له نامحسوس خطر سره ډېره مخ کې دلای شي، حال دا چې له دوی څخه د حاکم نظام د سپېڅلو اهدافو په تحقق کې باید کار اخیستل کېدلای.
د اسلامي امارت، خصوصا د اطلاعاتو او فرهنګ وزارت په وړاندې مخ ته له ډېرو پرتو ستونزو ډېره جدي او ګواښوونکې ستونزه یوه همدا ده، چې جدي توجه ته اړتیالري، ځکه صلیبي دښمن د عسکري جکړې ترڅنګ ((فکري)) جکړه هم په ډېرو لوړو لګښتو پرمخ بیوله. دښمنانو د فکري جګړي د پرمخ بیولو لپاره ډېر وسائِل لرل؛ خو اغېزمن وسائل یې رسنۍ (مطبوعات) ول، چې د هیواد داخل کې د دښمن له خوا جوړې شوې رسنې اوس هم الحمدلله تر ډېره د اسلامي امارت په واک کې دي؛ خو څومره چې دښمن د فکري اشغال په برخه کې له همدې رسنیو استفاده کوله؛ اوس د اطلاعاتو او فرهنګ وزارت او نور ذیدخل ادارات له فکري اشغال څخه د خلاصون په برخه کې استفاده نه ترې کوي!؟
جالبه داده هماغه عمال، چې د اسلام د روان خلاف دا خطرناکه جګړه یې پرمخ وړله د خپلو ظاهري بڼو (شکلونو) په اړولوسره لاهم برحال او فعال دي. هغه چا، چې د دوی ماهیت په ژوره توګه درک کړی وي د ګردیو میزونو په ترڅ کې پرې پوهېږي، چې اوس هم په پوښتنوکې زهر پاشي او لاهم خپل بدنام اهداف په اصطلاح تر بوسو لاندې تعقیبوي.
د اطلاعاتو او فرهنګ وزارت ته پکاردي، چې زموږ په مسلمانه ټولنه کې د امریکایانو د فکري جګړي د ژورو اغېزو د خنثی کولولپاره باید مجاعد ژورنالستان وروزي هغه مهال به موږ په ټولنه کې له معنوي اشغال څخه د خلاصون لپاه هم اغېزمن او کوټلي ګامونه اوچت کړي وي ان شآءالله
