لیکنه: ح.ن
د مسکو فارمټ یو اغېزناک دیپلوماتیک پلټ فارم دی، چې ډیرۍ د افغانستان او سیمې هېوادونو د ستونزو او پېچلو مسئلو ته د حل لارو د پیدا کولو لپاره دایریږي. دغه فارمټ په ۲۰۱۷ زېږدیز کال کې ایجاد شوی او موخه یې دا ده، چې سیمه ییز قدرتونه او ښکيل هېوادونه تر یوه چتر لاندې راټول شي او په افغانستان او سیمه کې د ثبات، امنیت او پرمختیا د ودې او ټینګښت لپاره دیالوګ، تفاهم او خبرې اترې ترسره شي.
دغه فارمټ د سیمه ییزو همکاریو د لا پیاوړي کولو او د دیالوګ او تفاهم له لارې د پېچلو مسئلو د حل کولو لپاره یو مناسب چوکاټ دی، چې افغانستان ته یې بې شمېره ګټې رسیږي. د دغو ګټو څو بېلګې یې په لاندې ډول دي:
سیمه ییزه همکاري: د مسکو فارمټ د افغانستان او سیمې هېوادونو پر وړاندې د پېچلو ننګونو او ستونزو د حل لپاره د سیمه ییزې همکارۍ پر اهمیت ټینګار کوي. دا فارمټ د منځنۍ اسیا د هېوادونو، لکه، روسیې، چین، هند، پاکستان، ایران او افغانستان په ګډون د هر اړخیزو خبرو اترو لپاره یو چاپېریال جوړوي او تر ډېره هڅه ترسره کیږي ترڅو ډاډ ترلاسه شي، چې د سیمې هېوادونو اندېښتنې او ګټې په پام کې ونیول شي او د سولې، امنیت او ثبات لپاره د همکارۍ کچه لا زیاته او اغېزناکه شي.
امنیتي همکاري: د مسکو فارمټ د سولې او ثبات د ټینګښت، نشه یې توکو قاچاق او نورو امنیتي ګواښونو سره د مبارزې په برخه کې سیمه ییزې همکارۍ ته زمینه برابروي. یاد فارمټ د امنیتي او استخباراتي معلوماتو د راټولو او شریکولو له لارې، دا فرصت چمتو کوي ترڅو د پورته ذکر شویو مسئلو د حل لپاره پر اغېزناکو او د تطبیق وړ ستراتیژیو کار ترسره شي، چې دا چاره د سیمې هېوادونو د ثبات ټینګښت سره مرسته کوي.
اقتصادي پراختیا او بشري مرستې: د مسکو فارمټ، د افغانستان بشري او پرمختیایي اړتیاوې په ګوته کوی. د مسکو فارمټ کې، ګډې همکارۍ لا هڅول کیږي ترڅو ډاډ ترلاسه شي، چې مرستې په اغېزناکه توګه راټولې او په افغانستان کې اړمنو کسانو ته ورسیږي. د دې سربېره، په اقتصادي ډګر کې د مسکو فارمټ د افغانستان اوږد مهاله ودې او اقتصادي ټیکاو ته د رسېدو لپاره د هېواد د اقتصادي پراختیایي نوښتونو، د زېربناو بیارغونه، او پانګونې ته هم وده ورکوي.
ډیپلوماتیک ښکېلتیا: د افغانستان لپاره د مسکو فارمټ کې ګډون د سیمه ییزو او نړیوالو قدرتونو سره د ډیپلوماتیکو ښکېلتیاو کچه زیاتوي. دا چاره به مرسته وکړي ترڅو د ګاونډیو، سیمې او نړۍ له هېوادونو سره د افغانستان ډیپلوماتیکې اړیکې لا پیاوړې او د سولې او پراختیا د هڅو لپاره نړیوال ملاتړ هم ترلاسه شي.
څو بُعدي تګلاره: د مسکو فارمټ دا یقیني کوي چې د ټولو اړوندو هېوادونو او قدرتونو ګټې او اندېښتنې په پام کې نیول کیږي. دا چاره به د افغانستان د ننګونو د حل او متوازن انکشاف ته زمینه برابره کړي.
ظرفیت جوړونه: د مسکو فارمټ له لارې، افغانستان د ظرفیت جوړونې له نوښتونو څخه ګټه پورته کوي. سیمه ییزه همکاري په افغانستان کې د امنیت، حکومتوالۍ، او پرمختیایي چارو په اغېزناکه اداره کولو کې د بېلابېلو ادارو وړتیا او مسلکي ظرفیت لوړوي.
د نړۍوال ملاتړ زیاتوالی: د مسکو فارمټ افغانستان لپاره د نړۍوالو پام او ملاتړ په جلبولو کې مرسته کوي، په داسې پلټ فارم کې د افغانستان د ننګونو، ستونزو او اړتیاو په روښانه کولو سره، دغه فارمټ د افغانستان د بیارغونې او پرمختیایي چارو د ملاتړ لپاره اضافي سرچینې متحرکه کوي او سیاسي ارادې ته هم تر ډېره بدلون ورکوي.
ستراتیژیکه حل لاره: په خبرو اترو او همکارۍ باندې د مسکو فارمټ ټینګار، د افغانستان ستونزو او ننګونو ته د پایداره حل لارې لپاره اړین فرصتونه رامنځته کوي، چې دغه فارمټ په افغانستان کې د اوږد مهالې سولې او ثبات د ټیکاو سره مرسته کوي.
د مسکو فارمټ افغانستان ته د سیمه ییزو همکاریو او د بېلابېلو ننګونو د حل لپاره یو مناسبت چاپېریال رامنځته کوي. د امنیتي همکاریو د زیاتولو، د اقتصادي پراختیا په وده او جیو پولیټیک ګټو د انډول کولو له لارې، یاد فارمټ د افغانستان د ثبات او سوکالۍ په پرمختګ کې مهم رول لوبوي. د دوامدارې ژمنې او ګډې همکارۍ له لارې، د مسکو فارمټ کولی شي د یوه سوله ییز، پرمختللي، او پرځان بسیا افغانستان لپاره مرسته وکړي.
