لیکنه: ح.ن
اسلامي امارت په ټولو سکټورونو کې د اصلاحاتو او نوښتونو د رامنځته کولو او په هېواد کې د یو شمېر اقتصادي، بنسټیزو او ملي پروګرامونو پر تطبیق سربېره، په دې وروستیو کې په ښاري سیمو کې د سوالګرۍ د سترې ننګونې او ستونزې حل ته ځانګړې پاملرنه کړې ده. اسلامي امارت د ګټورو تګلارو په ترتیب او عملي کولو او همدارنګه د ټولنیزې هوساینې په موخه د یو شمېر پروګرامونو د تطبیق له لارې، په سړکونو، لارو او کوڅو کې د سوالګرو د شمېر په کمولو کې د پام وړ بریا ترلاسه کړې ده. په دې لیکنه کې د اسلامي امارت پر هغو ګټورو تګلارو تمرکز شوی، چې په ښاري سیمو کې د سوالګرۍ د کمولو او یا ختمولو په برخه کې موثرې تمامې شوې دي.
د اسلامي امارت له لوري یو له لومړنیو ګامونو څخه د سوالګرو د پېژندلو او ثبتولو په موخه هر اړخیزه سرشمیرنه ترسره کول وو. اسلامي امارت له ځایي چارواکو، د ټولنې مشرانو، ټولنیزو کارکوونکو او رضا کارانو سره په همغږۍ په ښاري سیمو کې د سوالګرو کره او دقیق معلومات راټول او سر شمېرنه یې ترسره کړه.
همدا راز، په دویم ګام کې، په ښاري سیمو کې د ساتنې، پالنې او بیارغونې د مرکزونو جوړول شامل دي، چې موخه یې سوالګرو ته د سرپناه، طبي او روغتیايي پاملرنې او حرفوي زده کړو د اړینو فرصتونو برابرول دي. دا مرکزونه په داسې ډول ډیزاین شوي، چې په کې د سوالګرو سمدستي اړتیاوو ته رسېدنه کېږي او په ټولنه کې د دوی د بیا یوځای کېدو لپاره اوږد مهالي پلانونه او حل لارې هم شاملې دي. دغو مرکزونو په حقیقت کې یو خوندي چاپېریال چمتو کړی چېرې، چې سوالګر کولی شي اړینه روغتیایي او روانې درملنه او همدارنګه د اړتیا وړ حرفوي او مسلکي مهارتونه زده او ترلاسه کړي ترڅو دوی په اسانۍ سره وکولی شي د ټولنې په کاري چاپېریال کې په موثره توګه مدغم شي.
همداراز، د دې لپاره، چې د سوالګرو دوامدارې اقتصادي ودې ته پاملرنه وشي، اړتیا ده ترڅو پر یو شمېر ګټورو ستراتېژیو او پروګرامونو تمرکز وشي. اسلامي امارت د سوالګرو اړتیاوو او وړتیاوو ته په کتو د ترکاڼۍ، خیاطۍ، کرنې او نورو تجارتونو په برخه کې د حرفوي زده کړو د پروګرامونو دایرولو ته مخه کړې ترڅو د سوالګرو کاري او مسلکي مهارتونه لوړ شي او په ټولنه کې دوی ته د کاري فرصتونو د رامنځته کولو له لارې د ژوند د لازمو اسانتیاوو په برابرولو کې له دوی سره مرسته وکړي. دا چاره له یوې خوا د سوالګرۍ ټغر له ښاري سیمو څخه راټولوي او له بل پلوه، سوالګرو ته د یوه با عزت ژوند زمینه هم برابروي.
د اسلامي امارت د سوالګرۍ د له منځه وړلو په تګلاره کې، د عامه پوهاوي د پروګرامونو تنظیم او پرمخ بېول هم شامل دي. اسلامي امارت د عامه پوهاوي د کمپاینونو د ترسره کولو له لارې هڅه کړې ترڅو د سوالګرۍ د اړوندو موضوعاتو او د زیانونو په اړه یې خلکو ته عامه پوهاوی ورکړي او پر دې سربېره، هېوادوال دې ته وهڅوي ترڅو له حکومت سره د دغې تګلارې په تطبیق او عملي کولو کې هر اړخیزه همکاري وکړي. اسلامي امارت د راډیوګانو، تلویزیونونو، ټولنیزو رسنیو او ټولنیزو جوړښتونو له آدرسه د اړینو پیغامونو په انتقال او خلکو ته یې په رسولو کې ورڅخه استفاده کوي.
اسلامي امارت په ښاري سیمو کې د سوالګرۍ د له منځه وړلو لپاره د سوالګرۍ پر ضد یو شمېر اړین مقررات نافذ کري دي. د قانون پلي کوونکو اداراتو ته دنده سپارل شوې، چې له ښاري سیمو څخه څارنه ترسره کړي او ډاډ ترلاسه کړي، چې سوالګر له سړکونو او کوڅو راټول او د بیارغونې مناسبو مرکزونو ته لېږل شوي دي. دغې کړنلارې نه یوازې د عامه نظم په راوستلو او ساتلو کې مرسته کړې، بلکې دا ډاډ هم ترلاسه شوی، چې سوالګر په سړکونو کې د ژوند کولو پر ځای، یو باعزته ژوند غوره کړي او هغه مرستې ترلاسه کړي، چې دوی ورته اړتیا لري.
د اسلامي امارت له لوري د دې ستراتېژیو پلي کول ډېری مثبتې پایلې لري، چې څو یې په لاندې ډول دي:
په سړکونو او کوڅو کې د سوالګرو کمښت: د دغې تګلارې له ټولو سمدستي اغېزه، په سړکونو، لارو او کوڅو کې د سوالګرو په شمېر کې د پام وړ کمښت دی. دا په دې معنی ده، چې په ښاري سیمو کې د بېوزلۍ کچه ورځ تربلې مخ په کمېدو ده.
د سوالګرو د ژوند د کیفیت ښه والی: هغه کسان، چې د بیارغونې په پروګرامونو کې یې برخه اخیستې، اوس له ښې روغتیا، با ثباته ژوند، درناوي او انساني کرامت څخه برخمن شوي دي. حرفوي زده کړې او د کاري فرصتونو برابرول دوی ته په ژوند کې د هدف ټاکلو او خپلواکۍ د احساس زمینه برابره کړې ده.
د ټولنې ملاتړ او ښکېلتیا: د عامه پوهاوي کمپاینونو د خلکو ترمنځ د ټولنیز مسئولیت احساس رامنځته کړی او اوس خلک د دې پدیدې د له منځه وړلو په موخه له حکومت سره همکاري کوي او د پیسو د ورکړې پرځای سوالګر د بیارغونې مرکزونو ته استوي.
عامه نظم او خوندیتوب: په لارو، کوڅو او سړکونو کې د سوالګرو کمښت د عامه خوندیتوب او ښاری نظم په ښه کولو کې مرسته کړې او اوس په ښاري سیمو کې د ښاریانو لپاره یو خوندي او خوندور چاپېریال رامنځته شوی دی.
د ستراتېژیک پلان جوړونې، بیارغونې، حرفوي زده کړو، عامه پوهاوي او د قانون د پلي کولو له لارې، د سوالګرۍ د کمولو لپاره د اسلامي امارت هر اړخیزه کړنلاره د یو منظم، خوندي او خوندور ښاري چاپیریال په رامنځته کولو کې بریالۍ ثابته شوې ده. اسلامي امارت د سوالګرۍ د سمدستي اړتیاوو او اصلي لاملونو دواړو ته په رسېدو سره، د دوامدارې ټولنیزې هوساینې لپاره د سیمې او نړۍ هېوادونو ته یوه ښکاره بېلګه وړاندې کړې ده. اسلامي امارت هڅه کوي، د کاري ژمنتیا او د سرچینو د تخصیص له لارې دا لړۍ لا پیاوړې وساتي ترڅو د دغه ناورین لمنه په پوره توګه له ښاري سیمو څخه راټوله شي او سوالګرو ته یو داسې چاپېریال رامنځته کړي ترڅو هر سوالګر وګړی د وقار او پر ځان د بسیا ژوند کولو فرصت ولري.
